Almaty ákimi Darhan Satybaldy jumys saparymen Polısıa departamentine bardy. Sapar barysynda ol ishki ister organdarynyń qyzmetimen, departament ǵımarattarynda júrgizilip jatqan jóndeý jumystarynyń barysymen, sondaı-aq jergilikti búdjet esebinen alynǵan jańartylǵan tehnıkamen tanysty.
Qaýipsizdikti arttyrýǵa jáne polısıa jumysynyń tıimdiligin kóterýge baǵyttalǵan zamanaýı avtokólikter men arnaıy quraldar kórsetildi.
Ákim sondaı-aq Polısıa departamentiniń Jedel basqarý ortalyǵynda (JBO) bolyp, beınebaqylaý júıesiniń jumysymen jáne qoǵamdyq tártipti qamtamasyz etýde sıfrlyq tehnologıalardy engizý barysymen tanysty.
Almatydaǵy JBO 2000 jyldyń jeltoqsanynda ashylyp, Qazaqstandaǵy alǵashqy ortalyq boldy. Búginde munda táýlik boıy 28 qyzmetker jumys isteıdi. Júıege 53 myń kamera qosylǵan, olardyń ishinde bet-álpetti taný fýnksıasy bar qurylǵylar da bar. Ieleriniń kelisimimen mundaı tehnologıalar oıyn-saýyq oryndarynda — barlar men meıramhanalarda da ornatylady. Olar quqyq buzýshylyqtyń aldyn alýǵa jáne izdeýde júrgen azamattardy anyqtaýǵa qoldanylady. Jyl sońyna deıin Target platformasyna taǵy 8 myń kamerany qosý josparlanǵan.
Darhan Satybaldy qala turǵyndarynyń qaýipsizdigi basty basymdyq ekenin atap ótip, polısıanyń materıaldyq-tehnıkalyq bazasyn nyǵaıtýdyń jáne halyqtyń quqyq qorǵaý organdaryna degen senimin arttyrýdyń mańyzdylyǵyn basa aıtty.
Departamentti aralaýǵa qala ákimi apparatynyń basshylary, Almaty máslıhatynyń depýtattary jáne Polısıa departamentiniń basshylyq quramy qatysty.