Almaty ákimi Darhan Satybaldy merdiger uıymdardyń quryltaıshylarymen ótken keńeste qalanyń jobalarǵa nemquraıly qaraýǵa jol berilmeıtinin aıtty, - dep habarlaıdy Aqshamnews.kz tilshisi.
Ákimniń aıtýynsha, mıllıardtaǵan qarjy alǵan merdiger uıymdar ýáde etilgen merzimde isin aıaqtamaı, sapasyz jumys istep, qala kelbetine nuqsan keltirip otyr.
"Birneshe ondaǵan tehnıka men jumysshy jumyldyrylady dep josparlanǵan nysandarda bar bolǵany bir-eki kólik pen sanaýly adam júr. Al turǵyndar opyrylyp ketken jolǵa, shań men topyraqqa, qazylǵannan keıin qaıta qalpyna keltirilmegen aýmaqtarǵa shaǵymdanyp jatyr. Bul jumys emes, bul jaýapsyzdyq", – dedi ákim.
Merdigerlerdiń salǵyrttyǵy saldarynan jobalar uzaqqa sozylyp, keıde qarjylyq qıyndyqtarǵa baılanysty toqtap qalady. Qurylys barysynda tehnologıalyq talaptardyń saqtalmaýy men qazylǵan joldyń qaıta qalpyna keltirilmeýi de qala basshysynyń synyna ushyrady.
Ákimniń aıtýynsha, nebári birneshe merdiger uıymǵa ǵana 38 mıllıard teńgeden astam qarjy bólingendikten, mundaı aýqymdy ınvestısıa kezinde qala bıligi nátıjeni talap etýge tolyq quqyly.
"Jaǵdaıdy syrtqy sebepterge siltep, kináni basqaǵa artýǵa bolmaıdy. Jumysty sapaly da ýaqytyly oryndasyn, áıtpese Almaty jobalarynan olardy shettetemiz. Salǵyrttyqqa jol bergenderdi lısenzıasynan aıyryp, jaýapqa tartamyz", – dedi Darhan Satybaldy.