Almaty ákimi Darhan Satybaldy Bostandyq aýdanynyń basshysymen birge jıyn ótkizip, óńirdiń áleýmettik-ekonomıkalyq damýy, ınfraqurylym jáne áleýmettik saladaǵy túıtkilderdi talqylandy.
Aýdan bıylǵy alǵashqy jartyjyldyqty jospardan joǵary kórsetkishpen aıaqtady. Jyl basynan aýdan búdjetine 708,8 mıllıard teńge tústi. Bul josparlanǵan 663,5 mıllıard teńgeden edáýir kóp. Degenmen, shahar basshysy oń nátıje qala ómiriniń sapasyn arttyrýǵa degen nazardy báseńdetpeýi tıis ekenin eskertti.
Ákim apparaty júrgizgen taldaý birqatar júıeli máseleni ashyp kórsetti. Aýyzsý, jol jáne áleýmettik ınfraqurylym sıaqty basty qajettilikterge qarjy jetispeıdi, halyqpen baılanys nashar. Turǵyndardyń ótinishi atústi qaralady, bul jergilikti bılikke degen senimdi seldiretedi.
Keıbir mektep pen medısına mekemenniń jaı-kúıi, áleýmettik nysandardy jańartý merziminiń sozylýy, kóshkin qaýpi bar aýmaqtar men órtke qarsy sý júıesin qamtıtyn keshendi qaýipsizdik sharalarynyń bolmaýy da alańdatady Al qylmys deńgeıiniń ósýi, sonyń ishinde kámeletke tolmaǵandar arasyndaǵy zańbuzýshylyqtar, polısıanyń aldyn alý sharalarynyń álsiz ekenin ańǵartady.
Darhan Satybaldy jaýapty tulǵalarǵa anyqtalǵan máselelerdi jedel sheship, nátıjesin qysqa merzimde baıandaýdy tapsyrdy.
«Apparatqa tapsyrma berdim. Endi apta saıyn joldardyń, trotýarlardyń, abattandyrý men ınjenerlik jelilerdiń jaǵdaıyn baqylap otyramyz», – dedi Almaty ákimi.
Darhan Satybaldynyń aıtýynsha, qalalyq qyzmettiń árdaıym alda júrip, máseleniń aldyn alý kerek.
«Sizder birdeńeniń buzylǵanyn kútip otyrasyzdar, al ol buzylǵan soń: jobalyq-smetalyq qujattama daıyndaımyz, oǵan taǵy bir jyl ketedi deısizder. Sodan keıin tender ótkizesizder, al merdiger jaýapsyz bolyp shyqsa, jumys taǵy da toqtaıdy. Al siz aýdan ákimi bolsańyz, sheshimin tabýyńyz kerek», – dedi ol Bostandyq aýdanynyń ákimine.
Qala basshysy búdjet qarajatyn únemdi paıdalaný qajettigin jáne jumys josparlaý kezinde aldyn alý sharalary men ınfraqurylymdy ýaqytyly jańartýdy eskerý kerek ekenin de basa aıtty.
Ákimniń tapsyrmasy aıasynda Bostandyq aýdanynda jyl sońyna deıin sý, káriz, jylý jáne elektr jelilerin qaıta jańartý aıaqtalmaq. Buǵan qosa, 3 myńnan astam sham aýystyrylyp, buryn jaryqsyz qalǵan kóshelerge jańa jaryq baǵandary ornatylady.
Keńes aıaqtalǵan soń Darhan Satybaldy turǵyndardy qabyldady. Kezdesýde aýdan halqy abattandyrý, ınjenerlik jáne áleýmettik ınfraqurylymdy damytý, turǵyn úı-kommýnaldyq qyzmet sapasy jaıyn talqylady. Ár másele boıynsha tıisti basqarmalar men aýdandyq qyzmetterge naqty merzim belgileı otyryp tapsyrma berdi.