Almaty ákimi Darhan Satybaldy Jetisý aýdanynda uzyndyǵy shamamen 2 shaqyrym bolatyn sý qubyry jelisiniń qaıta jańǵyrtý barysyn ózi tekserdi. Jumystardy tapsyrys berýshi – «Almaty Sý» MKK, merdiger – «SK Megaron» JSHS atqarýda.
Oqıǵa ornynda qala ákimi merdigerge jumystyń kesteden keshigip jatqanyn aıtyp, qatań eskertý jasady.
«Jumystar kidirissiz aıaqtalýǵa tıis. Qazanda jylytý maýsymy bastalady, alda jańbyrly kúnder tur, bir mınýtty da joǵaltýǵa bolmaıdy. Táýlik boıy jumys isteńizder, eshqandaı kidiris bolmaýy qajet», – dep atap ótti ákim.
Darhan Satybaldy merdigerlerdi jeke jaýapkershilikke shaqyryp, jobanyń oryndalýy óziniń tikeleı baqylaýynda ekenin jetkizdi.
Qaıta jańǵyrtý jumystary Gersen kóshesi boıynda – Rysqulov dańǵylynan Vıláms kóshesine deıingi aralyqty qamtıdy. Jalpy uzyndyǵy 1,9 shaqyrym jeliniń 847 metri – magıstraldyq, al 1 shaqyrymnan astamy – abonenttik jeli.
Qurylys-montaj jumystary 2025 jyldyń tamyzynda bastaldy. Bastapqyda merdigerge qarashaǵa deıin merzim berilgen bolatyn. Alaıda ákim tapsyrmasymen jumystar jedeldetilip, Jetisý aýdanynyń turǵyndary jylytý maýsymynyń basynda sýǵa qol jetkizýge tıis.
Qazir 560 metrde topyraq qazylyp, 456 metr qubyr tóseldi, 420 metrde keri toltyrý jumystary júrgizildi. Sondaı-aq dıametri 630 mm bolatyn 12 tarmaq qubyr ornatylyp, 8 temirbeton qurylǵysy qoıyldy. Barlyq kezeń aıaqtalǵannan keıin merdiger shamamen 1 900 sharshy metr jol jabyndysyn qalpyna keltirýge mindetti.
Qaıta jańǵyrtý jumystary Jetisý aýdany turǵyndaryn úzdiksiz ári sapaly aýyz sýmen senimdi túrde qamtýǵa múmkindik beredi.