Bıylǵy 2022 jyldyń naýryz aıynyń bastalýymen qatar qoǵamnyń saıası ómirine de birshama ózgerister ene bastady. Jańa, jańǵyrǵan Qazaqstandy qalyptastyrýdy maqsat etip otyrǵan memleketimizdiń jetekshi partıasy óziniń Nur Otan ataýyn «Amanatqa» aýystyrdy.
Bul qadam jónindegi aqparat elimizdiń jurtshylyǵy úshin óziniń kezekten tys seziniń májilis nátıjelerinen belgili boldy. Árıne, jańa ataýmen qatar qoǵamda jańa maǵynalyq, áleýmettik-praktıkalyq ózgeristerdiń oryn alatynan úmittenemiz. Sebebi, qoǵamda burynǵy Nur Otan dep atalǵan partıanyń jumys isteý stılin keńester dáýirindegi Komýnıstik partıanyń is-qımyldarymen teńgeretin baǵalaýlar, synı kózqarastar bar ekenin joqqa shyǵara almaımyz. Sondyqtan qoǵamdaǵy júıeli jańǵyrýdy basqara alatyndaı jáne ony maksımaldy túrde jańa talaptarǵa saı júzege asyra alatyndaı «Amanat» partıasynda qabiletter men nıetter bolyp jatsa, onda jalpy qazaqstandyq qoǵamnyń úmitiniń aqtalǵany.
Jalpy, barlyq partıalardyń jumystary bir saryndy is-sharalar baǵdarlamalaryn oryndaýmen kómkerilip jatady. Aldymen, partıa músheleriniń bastaýysh uıymdary jurtshylyqpen, jekelegen azamattarmen tikeleı suhbatqa barý, Úkimet aldynda kúrdeli de ózekti máselelerdi qoıa bilý qabiletine ıe bolýy qajet. Onsyz partıanyń qoǵamdaǵy bedeli kóterilmeıdi, halyqtyń senimine ıe bola almaıdy.
Qazirgi kezeńdegi eń úlken máselelerdiń biri – halyq pen bıliktiń arasyndaǵy qatynastardy úılestirý, ózara jaqyndastyrý, syndarly suhbattyq deńgeıdegi talqylaýlardy júrgizý. Mine, sonda ǵana qoǵamymyz áleýmettik jáne rýhanı progres, damý jolynda qomaqty jeńisterge jetýge múmkindikter alady jáne kóptegen saıası-ekonomıkalyq, dúnıetanymdyq qaıshylyqtardy ýaqytyly sheship otyrady.