TJM basshysy general-leıtenant Shyńǵys Árinov Almaty oblysynyń Kegen aýylynda jańa órt sóndirý deposyn ashty, - dep habarlaıdy aqshamnews.kz.
Ashylý rásimine Almaty oblysynyń ákimi Marat Sultanǵazıev, TJD basshylyǵy, qyzmet ardagerleri, sondaı-aq aýyl turǵyndary qatysty. Atalǵan nysan Qazaqstan TJ mınıstrliginiń strategıalyq jospary aıasynda jergilikti búdjet qarajaty esebinen salyndy.
İs-shara barysynda sóz sóılegen mınıstr azamattyq qorǵaý júıesin nyǵaıtý jáne aýyldyq jerlerdegi qaýipsizdik deńgeıin arttyrý Memleket basshysy qoıǵan basym mindetterdiń biri ekenin atap ótti. Sondaı-aq Shyńǵys Árinov jańa órt sóndirý deposynyń, zamanaýı órt-qutqarý tehnıkasynyń, onyń ishinde órt avtosısternasynyń, jedel-qutqarý avtokóliginiń jáne jol talǵamaıtyn kóliktiń kiltterin tabys etti.
Jańa órt sóndirý deposy jalpy sany 28 myńnan astam halqy bar 12 aýyldyq okrýg pen 34 eldi mekendi órtten qorǵaýdy qamtamasyz etedi. Ǵımarat modýldik tehnologıa boıynsha salynǵan, bul qajet bolǵan jaǵdaıda nysandy jedel túrde keńeıtýge jáne jańǵyrtýǵa múmkindik beredi. Depo táýlik boıy qyzmet atqarýǵa qajetti barlyq jaǵdaımen tolyq jabdyqtalǵan: zamanaýı baılanys quraldary bar dıspecherlik pýnkt, eki órt sóndirý avtokóligine arnalǵan garajdar, sanıtarlyq-turmystyq úı-jaılar, as úı jáne demalys bólmeleri bar. Sonymen qatar sporttyq jattyǵý qural-jabdyqtarmen jaraqtalǵan «Batyr Team» jattyǵý aımaǵy bar.
İs-shara aıasynda nysannyń qurylysyna joǵary jaýapkershilikpen qatysyp, belsendilik tanytqan azamattar TJM vedimistik nagradalarymen marapattaldy. TJM aýyldyq eldi mekenderdegi ınfraqurylymdy damytý, órtke qarsy qaýipsizdik júıesin nyǵaıtý jáne eldegi halyqtyń qorǵalý deńgeıin arttyrý baǵytyndaǵy jumysyn jalǵastyrýda.