Qazaqstan – turaqtylyqtyń sımvoly.
BUU Bas Assambleıasynyń 76-sessıasyna qatysý sheńberinde QR Premer-Mınıstriniń orynbasary – Syrtqy ister mınıstri Muhtar Tileýberdi BUU Bas hatshysy Antonıý Gýterrıshpen kezdesti, dep habarlaıdy Almaty-akshamy.kz SİM-ge silteme jasap.
Antonıý Gýterrısh Aýǵanstanǵa járdemdesý jónindegi BUU mısıasynyń qashyqtaǵy keńsesin Almatyda ornalastyrý týraly sheshim qabyldaǵany úshin Qazaqstan Prezıdentine alǵysyn bildirdi.
Ol bizdiń elimiz turaqtylyqtyń sımvoly jáne kópjaqtylyqty ustanýdyń úlgisi bolyp tabylatynyn erekshe atap ótti.
«Qazaqstannyń bul sheshimin biz tek kómek retinde qana baǵalamaımyz. Siz BUU men Qazaqstan arasyndaǵy tamasha qarym-qatynastardy odan ári damytýǵa yqpal etetin dıplomatıalyq baýyrlastyqtyń shynaıy rýhyn kórsettińiz», - dedi A.Gýterrısh.
Óz kezeginde Mınıstr Prezıdent Q.Toqaevtyń BUU-nyń Bıologıalyq qaýipsizdik jónindegi halyqaralyq agenttigin qurý jónindegi bastamasynyń iske asyrylý barysy týraly egjeı-tegjeıli habardar etti.