«Elimizdiń eń basty meıramy – Respýblıka kúni qutty bolsyn!
Prezıdent Qasym-Jomart Toqaevtyń qatysýymen memlekettik nagradalar men syılyqtar tapsyrýǵa arnalǵan saltanatty rásim ótti, dep habarlaıdy almaty-akshamy.kz
«Bul – qazaqtyń memlekettilik dástúri qaıta jańǵyrǵan tarıhı kún. Kók túrikter dáýirinen, Altyn Orda, Qazaq handyǵy zamanynan kele jatqan eldigimiz tamyryn tapqan kún. Bul – Alash arystarynyń azattyq jolyndaǵy arpalysy aqtalǵan kún. Halqymyzda «Egemen bolmaı, el bolmas» degen sóz bar. Osydan 33 jyl buryn tarıhı ádildik ornady. Qazaqstannyń Memlekettik egemendigi týraly deklarasıa qabyldandy. Osy mańyzdy qujat jurtymyzdyń azattyq alýyna jol ashty», - dedi Prezıdent.
«Shyn máninde, egemendik deklarasıasyn qabyldaý ońaıǵa soqqan joq. Elimizdiń ulttyq quramy birkelki emes edi. Sol kezdegi Parlamentte, ıaǵnı Joǵarǵy Keńeste jáne búkil qoǵamymyzda uzaq pikirtalas, qyzý talqylaý boldy. Qujattyń ár sózin, ár babyn qorǵaýǵa týra keldi. Álıhan Bókeıhan «Bostandyqqa aparatyn jalǵyz jol – ulttyq yntymaq qana» degen. El aǵalary halqymyzdyń ardaqty ulynyń bul ósıetine adal boldy. Olar jaýapty sátte uıymshyldyqpen ult múddesin qorǵaı bildi. Aqjoltaı qujat jurtymyzdyń talap-tilegine saı jazyldy, otanshyl azamattardyń aqyl-parasatynyń arqasynda qabyldandy. Olardyń syn saǵattaǵy batyldyǵyn naǵyz erlik dep baǵalaýǵa bolady», - dedi Memleket basshysy.