Túrki tildes memleketterdiń yntymaqtastyq keńesi taraptar arasyndaǵy ózara senim, dostyq pen tatýlyqty nyǵaıtady.
Túrki tildes memleketterdiń yntymaqtastyq keńesin qurý týraly qol qoıylǵan Nahchyvan kelisimine bıyl 12 jyl tolyp otyr, dep habarlaıdy Almaty-akshamy.kz Almaty.tv-ge silteme jasap.
2009 jyldyń 3 qazanynda Ázirbaıjan Respýblıkasynyń Nahchyvan qalasynda ótken Túrkitildes memleketter basshylarynyń IX samıtinde Qazaqstan Respýblıkasynyń Tuńǵysh Prezıdenti Nursultan Nazarbaev túrki dúnıesin zertteıtin halyqaralyq ǵylymı ortalyq qurý týraly usynys jasady. Bul kelisimniń qabyldanýy túrki halyqtarynyń birligin nyǵaıtýdy kózdegen aımaqtyq hám elaralyq birlestikti qurýǵa negiz qalady.
Túrki tildes memleketterdiń Aqsaqaldar keńesi TMYK aıasynda jumys isteıtin, turaqty túrde áreket etetin konsýltatıvtik-keńesshi ınstıtýt retinde jumys atqaryp keledi. Baýyrlas elderdiń erikti túrde qurǵan biregeı halyqaralyq ǵylymı uıymy — «Halyqaralyq Túrki Akademıasy» 2014 jyldyń 28 tamyzynan bastap halyqaralyq mártebege ıe boldy.
Halyqaralyq Túrki Akademıasy Túrki keńesi, TúrkPA, TÚRKSOI jáne IýNESKO halyqaralyq uıymymen, sondaı-aq Islam tarıhy, óneri men mádenıetin zertteý ortalyǵymen (IRCICA) de áriptestik ornatty.
Túrki tildes memleketterdiń yntymaqtastyq keńesi taraptar arasyndaǵy ózara senim, dostyq pen tatý kórshilikti nyǵaıtýdy, óńirde jáne tutas álemde beıbitshilikti qoldaý jáne qaýipsizdik pen senimdi arttyrýdy, sondaı-aq ortaq múdde týdyratyn syrtqy saıası máseleler boıynsha, onyń ishinde halyqaralyq uıymdar sheńberinde jáne halyqaralyq forýmdarda ortaq kózqarasty izdestirýdi, túrki halyqtarynyń uly mádenı-tarıhı murasyn nasıhattaýdy kózdeıdi.
Qazaqstan Respýblıkasynyń Tuńǵysh Prezıdenti Nursultan Nazarbaev Túrki tildes memleketterdiń yntymaqtastyq keńesiniń ekinshi samıtinde: «Túrki Akademıasynyń, Mádenı mura qorynyń qurylýy bizdiń jastarymyzdy jaqyndastyrý, ortaq murany zerdeleý úshin tarıh pen tildi birlesip úırenýge degen yqylasymyzdy bildiredi», degen bolatyn.