Búgin (1938-2014) Qazaqstan Respýblıkasy Memlekettik Týynyń avtory, monýmentshi-sýretshi, Qazaqstannyń eńbek sińirgen mádenıet qaıratkeri Sháken Nıazbekovtiń týǵan kúni.
Ol Taraz qalasynda týǵan. Sankt-Peterbýrg kórkem ónerkásip ınstıtýtyn bitirgen, dep habarlaıdy aqshamnews.kz.
Eńbek joly: 1963-1966 jyldary Sankt-Peterbýrgtegi Elektr pisirý jabdyqtarynyń búkilodaqtyq ǵylymı-zertteý ınstıtýtynyń sýretshi-konstrýktory, 1966-1968 jyldary Qazaq KSR halyq sharýashylyq jetistikteri kórmesiniń sýretshisi, 1969-1982 jyldary Almaty qalasynyń bas sýretshisi, 1982-1987 jyldary Qazaqstan Sýretshiler odaǵynyń tóraǵasy, 1983-1984 jyldary KSRO Sýretshiler odaǵynyń hatshysy bolyp qyzmet etti.
Ol – «Abaı», «Mýzyka sazy», «Ańshylyq», «Qurmanǵazy», «Kisen ashqan», «Álı Batyr», «Syrym Datov» jáne basqa da alúmınıge, mysqa, jezge bederlengen monýmenttik týyndylardyń, Qazaqstan Respýblıkasy Týynyń, Almaty qalasy tańbasynyń avtory. Tehnıka ǵylymynyń doktory V. Zaıchıkpen birlesip jasaǵan pisirgish mashınasy Monrealdaǵy dúnıejúzilik kórmede kórsetildi.
«Globýs» televızorynyń kórkemdik-konstrýktorlyq sapasy úshin 1965 jyly Chehoslovakıada ótken halyqaralyq konkýrsta İ dárejeli syılyq berildi.
«Qurmet» ordenimen, 1998 jyly «Astana» medalimen, 2001 jyly «Qazaqstan táýelsizdigine 10 jyl» medalimen, 2005 jyly «Qazaqstan konstıtýtsıasyna 10 jyl» medali jáne t.b memlekettik marapattarmen marapattalǵan.