Almaty álemdegi stýdentterge arnalǵan eń jaqsy 100 qalanyń qataryna endi.
Halyqaralyq stýdentter kúni jyl saıyn 17 qarashada toılanady. Mereke 1941 jyly fashızmge qarsy kúresken elder stýdentteriniń Londonda ótken halyqaralyq kezdesýinde bekitildi, biraq 1946 jyldan bastap toılana bastady. Bul kún chehtiń patrıot stýdentterin eske alýǵa arnaldy, dep habarlaıdy Almaty-akshamy.kz
Árıne, bul mereke jastyqpen, romantıkamen jáne kóńil kóterýmen baılanysty bolýy kerek, biraq onyń tarıhy Ekinshi dúnıejúzilik soǵys kezinde Chehoslovakıada bastalǵan qaıǵyly oqıǵalarmen baılanysty.
Calend.ru –dyń málimetinshe, 1939 jyly 28 qazanda fashıser basyp alǵan Chehoslovakıada pragalyq stýdentter men olardyń ustazdary Chehoslovakıa memleketiniń qurylǵan kúnin (1918 j. 28 qazan) merekeleýge sherýge shyqty. Basqynshylardyń bólimsheleri demonstrasıany taratty, al medısına fakúltetiniń stýdenti Ian Opletaldy atyp óltirdi.
1939 jyly 15 qarashadaǵy Ian Opletaldy jerleý rásimi qaıtadan narazylyq aksıasyna aınaldy. Ondaǵan demonstranttar qamaýǵa alyndy. 17 qarashada stýdentter jataqhanalary qorshaýǵa alyndy. 1200-den astam stýdent tutqyndalyp, Zaksenhaýzen konslagerine túrmege jabyldy. Praganyń Rýzıne aýdanyndaǵy túrmeniń zyndanynda toǵyz stýdent pen stýdenttik qozǵalys belsendisi sotsyz ólim jazasyna kesildi. Chehıanyń barlyq ýnıversıtetteri Gıtlerdiń buıryǵymen soǵys aıaqtalǵanǵa deıin jabyldy.
Osy oqıǵalardyń qurmetine Halyqaralyq stýdentter kúni belgilendi, al soǵystan keıingi jyldarda onyń toılanýy 1946 jyly Pragada ótken Búkilálemdik stýdentter kongresinde bekitildi jáne sol ýaqyttan beri ol jyl saıyn atalyp ótedi.
Qazirgi ýaqytta Stýdentter kúni álemniń kóptegen elderinde toılanady jáne bul kúndi merekeleý baǵdarlamalary ár túrli bolǵanymen, stýdentter arasynda óte tanymal. Birde-bir ýnıversıtet osy merekeden tys qalmaıdy. Al bul kúnniń aldynda Beıbitshilik pen dostyq úshin kúrestiń halyqaralyq stýdenttik aptalyǵy (10-17 qarasha) ótedi.
Brıtandyq Studee konsaltıńtik kompanıasynyń nusqasy boıynsha Almaty stýdentterge arnalǵan álemdegi eń jaqsy 100 qalanyń qataryna endi. Turǵyn úıdiń ortasha quny men jaldamaly turǵyn úı, ınternet jyldamdyǵy, halyqaralyq reıtıńke engen ýnıversıtetterdiń sany syndy krıterııler boıynsha qalamyz 76-orynǵa turaqtady. Bul kórsetkish boıynsha Almaty Nú-Iorkten keıin, Varshavanyń aldynda tur. Aıtpaqshy, bul reıtıńte Máskeý 84-shi orynda, al Sankt-Peterbýrg 98-shi orynda.