Arabıka sortyndaǵy kofe baǵasy Nú-Iorktegi ICE Futures bırjasynyń saýda derekterine sáıkes 10 jyldyq rekordyn jańartty
Qarashanyń ortasynan beri fúcherster bir fýnt úshin 2,2 dollardan (0,45 keli) joǵary boldy. Buǵan deıin osy kórsetkishten joǵary kofe baǵasy 2012 jyldyń qańtarynda tirkelgen. Seısenbi, 16 qarashadaǵy saýda-sattyq barysynda jeltoqsandaǵy fúchersterdiń bir fýnty 2,24 dollarǵa deıin kóterildi, dep habarlaıdy Almaty-akshamy.kz
Baǵanyń ósýine iri óndirýshiler tarapynan jetkizilim bolmaýy sebep boldy. Brazılıada aıaz, qurǵaqshylyq boldy, Kolýmbıadaǵy daqyldar qatty jaýyn-shashynnan zardap shekti, al Vetnam eksporty júk tasymaldaý konteınerleriniń jetispeýshiliginen tómendegen.
AQSH sońǵy esebinde álemdik kofe qory byltyrǵymen salystyrǵanda 77 paıyzǵa tómendegenin aıtty. Kólik shyǵyndarynyń joǵary bolýyna, tyńaıtqyshtardyń qymbattaýyna jáne jumys kúshiniń tapshylyǵyna baılanysty kofe baǵasy kóterile beredi.
Aıta keteıik, qarashanyń basynda Birikken Ulttar Uıymynyń Azyq-túlik jáne aýyl sharýashylyǵy uıymy (FAO) azyq-túliktiń álemdik baǵasy rekordtyq deńgeıge kóterilip, 2011 jylǵy kórsetkishten asyp ketkenin habarlaǵan bolatyn. Qazanda eń suranysqa ıe azyq-túlik taýarlarynyń álemdik baǵasynyń aýytqýyn aı saıyn qadaǵalaıtyn Azyq-túlik baǵasy ındeksiniń ortasha máni qyrkúıekpen salystyrǵanda 3,9 paıyzǵa ósti.
