Atalmysh aýdan koronavırýsqa qarsy vaksınamen tolyq qamtamasyz etilgen.
Almaty qalasy Bostandyq aýdanynyń ákimi Altaı Rahymbetov Óńirlik komýnıkasıalar qyzmetinde ótken baspasóz konferensıasynda ekpe naýqanynyń barysy men Ashyq jobasynyń artyqshylyqtary týraly aıtty, dep habarlaıdy Almaty-akshamy.kz.
Onyń aıtýynsha, aýdanda 217 myń adam vaksına alýy tıis, búginde 113 myń adam ekpe aldy, bul 52%-dy qurady.
Altaı Rahymbetov Bostandyq aýdany koronavırýsqa qarsy vaksınamen tolyq qamtamasyz etilgenin aıtty. Ekpe pýnktteri emhanalar bazasynda da, tanymal SOSO-da da bar. Kásipkerlerdiń bastamasy boıynsha barlyq vaksınalanǵan azamattarǵa kez kelgen taýardy satyp alýǵa 5-ten 20%-ǵa deıin jeńildikter beriledi.
«Kásipkerler ózderiniń nysandaryna vaksına alǵan azamattar kelgen kezde qyzmetkerler juqtyrý qaýpinen qorǵalatynyn biledi. Osylaısha olar halyqtyń vaksına týraly bastamasyn qoldaıdy. Qalada ekpe pýnktteriniń biri ornalasqan «Mega sentr» SOSO basshylyǵyna halyq arasynda apta saıynǵy utys oıynyn ótkizgeni úshin alǵysymdy bildiremin. Tamyz aıynyń sońynda osy ekpe pýnktinde vaksına alǵandar arasynda bas júlde – avtokólik oınatylady. Bostandyq aýdanynyń turǵyndaryn vaksınaǵa belsendi qatysýǵa shaqyramyn. Eger biz tezirek qalypty ómirge oralǵymyz kelse, vaksınany keıinge qaldyrmaıyq», – dedi Altaı Rahymbetov.
Bostandyq aýdanynyń ákimi Ashyq jobasynyń múmkindikteri týraly aıtty. Ol qaýipsizdikti qosymshanyń basty artyqshylyǵy dep atady. Qazirgi ýaqytta bıznes koronavırýstyń jańa órshý qaýpinen týyndaǵan shekteýlermen jumys isteýge májbúr. Ashyq mobıldi qosymshasy QR-kodty paıdalaný jáne PTR ortaq bazasymen ıntegrasıalaý esebinen kelýshiniń mártebesin anyqtaýǵa múmkindik beredi. Osylaısha, jobanyń qatysýshysy bıznes sýbektisi qazirdiń ózinde qabyldanyp jatqan sanıtarlyq sharalar boıynsha qosymsha baqylaýdy qamtamasyz etedi.
«Aýdanymyzdyń kóptegen kásipkerleri jobaǵa qatysýǵa qyzyǵýshylyq tanytyp otyr. Alaıda, bul belgili bir jaýapkershilikti júkteıdi, barlyq kásipkerler qosymshanyń jumysyna adal qaramaıdy. Tekserý kezinde monıtorıńtik toptar kelýshiler óz mártebesin teksermeı, tynysh kiretin nysandardy anyqtaıdy. Osy múmkindikti paıdalana otyryp, kásipkerlerge kelýshilerdiń mártebesin skanerleýge jaýapkershilikpen qaraý kerektigin aıtqym keledi. Oryndalmaǵan jaǵdaıda olardy jobadan aldymen eki apta merzimge, al qaıtalap buzǵany úshin birjola shyǵarýǵa bolady», – dedi aýdan ákimi.
Altaı Rahymbetov Ashyq jumysyna «Mega sentr» SOSO men «Forým» saýda úıi qosylǵanyn aıtty.
Sóziniń sońynda Bostandyq aýdanynyń ákimi koronavırýstyń jańa shtamdary óte qaýipti ekenin, sondyqtan ekpe saldyrýdy tańdaý qajettigin aıtty.