Beıjińge barǵan Blınken Qytaı basshysymen kezdesti. Bul onyń Qytaı saparyna jańa sıpat berdi jáne eki eldiń qaıshylyqty retteýge degen qulshynysyn ańǵartty.
Kezdesýdiń bolatyny jaıynda aqparat quraldaryna bir saǵat buryn ǵana habarlanǵan.
Qytaı basshysy Sı Szınpın AQSH Memlekettik hatshysy Etnonı Blınkendi 19 maýsym túsken keıin Býmen konferens-zalynda qabyldady.
Budan buryn Blınken Qytaıdyń qazirgi Syrtqy ister mınıstri Sın Ganmen jáne syrtqy saıasat boıynsha joǵary laýazymdy tulǵasy Van Imen kezdesken bolatyn.
Sarapshylar, Van Imen kezdesýdiń nátıjesi Blınkenniń Sı Szınpınmen kezdesýin nemese kezdespeýin belgileıdi dep boljaǵan. Qazirgi jaǵdaıdan qaraǵanda Van I men Blınken asa názik máseleler boıynsha pikir alshaqtyǵyn qysqartqandaı.
Van-Blınken kezdesýiniń mazmuny endi ǵana jarıalanyp jatyr. Sonyń ózinde úsh saǵattyń dıalogtyń tolyq mazmuny BAQ úshin qoljetimsiz. Tek, Sınhýa agenttigi habarynda Van Idiń kezdesýde aıtqan sózderin keltiredi. Onyń pikirinshe, Qytaı-AQSH qaıshylyǵynyń túpki sebebi – AQSH-tyń Qytaıǵa qatysty qate túsinigi jáne Qytaıǵa qatysty qate saıasat júrgizýi eken.
Ol AQSH tarapynan «Qytaı qaýpi teorıasynan» bas tartyp, Qytaıdyń tehnologıalyq damýyna kedergi keltirmeýdi, ishki isterine orynsyz aralaspaýdy suraǵan. Buǵan qosa Taıvan máselesinde Qytaı ymyraǵa kele almaıdy degen syńaıda ustanymdaryn jetkizgen.