Túrli aqparattyq jáne saıası qysymdarǵa qaramastan AQSH Memlekettik hatshysy Qytaıǵa saparlaı bardy. Bul onyń óz laýazymyna kiriskennen bergi Qytaıda alǵash ret resmı kezdesý ótkizýi. Qytaılyq áriptesi Sın Ganmen kezdesýde taraptar az da bolsa dıplomatıalyq alǵa jyljyýǵa qol jetkizdi.
AQSH Memlekettik hatshysy Etnonı Blınken men Qytaı Syrtqy ister mınıstri Sın Gan 18 maýsym, jeksenbi kúni Dáoıýıtaı memlekettik qonaq úıinde kezdesti. Kezdesý 7 jarym saǵatqa sozyldy.
Árıne, Blınken men Sın Gan eki el arasyndaǵy qaıshylyqtyń túbegeıli problemalaryn talqylaýdy keıinge syryp qoıdy. Sebebi, Beıjiń men Vashıngtonnyń joǵary laýazymdylary arasynda kópten beri kezdesý bolmady. Bul degenimiz, talqylaıtyn máseleniń tym kóp ekenin kórsetedi. Uzaq ýaqytan beri alǵash qol jetkizgen joǵary deńgeıdegi kezdesýde tereń qaıshylyqty eńserip ketý tipten múmkin emes edi.
Degenmen Blınkenniń jumys papkasynda aımaqtyq qaýipsizdik, esirtkige qarsy kúres, klımattyń ózgerýi, jahandyq makroekonomıkalyq turaqtylyq, eki jaqta qamaýǵa alynǵan azamattary boıynsha almasý jasaý jáne AQSH-Qytaı arasyndaǵy qarym-qatynasty retteý sekildi máseleler turdy. Kezdesýde de osy máseleler talqylandy.
19 maýsym. Beıjiń. Entonı Blınken jáne Ýan I
Belgili bolǵandaı, Blınken qytaılyq áriptesin Qurama Shtattarǵa resmı saparmen barýǵa shaqyrǵan. Sın Gan buny qabyl alǵan. Bunyń ózi dıplomatıalyq júristerdiń jıileýi múmkin ekenin bildirse kerek.
Áıtkenmen, kezdesýden keıingi eki eldiń resmı málimdemelerin salystyrsaq, keıbir mańyzdy salalardaǵy tereń kelispeýshilik áli de saqtalyp otyrǵanyn kóre alamyz.
Al búgin, 19 maýsymyń tańynda Blınken qytaılyq burynǵy áriptesi ári Qytaıdyń syrtqy ister jónindegi joǵary laýazymdy tulǵasy, QKP OK Saıası Búrosynyń múshesi, Ortalyq Syrtqy ister komısıasy keńsesiniń dırektory Van Imen kezdesti.
Van I Blınkenmen talaı márte kezdesken. Sondyqtan ekeýiniń kezdesýi qazirgi Qytaı SİM basshysymen kezdesýge qaraǵanda aýqymdy taqyryptarǵa aýysqany anyq. Aıtalyq, strategıalyq qarym-qatynas deńgeıinde talqy ótkizgen bolýy múmkin. Al, Blınkenniń kezekti Beıjiń saparynda Qytaı tóraǵasy Sı Sınpınmen kezdesetini týraly naqty málimet bolmaǵan.
Qalaı desek te, Blınken sapary AQSH-Qytaı arasyndaǵy dıplomatıalyq salqyndyqqa az da bolsa jylymyq berdi. Derjavalar arasyndaǵy qarym-qatynas bizdiń el men aımaqqa da belgili deńgeıdegi áserin beretindikten, Beıjińdegi kezdesýler men nátıjelerin nazardan tys qaldyrmaýǵa týra keledi.
Blınken saparyna qatysty tolyqyraq «Almaty Aqshamy» basylymynyń aldaǵy sanynan oqı alasyz.