Bilim salasyna jańalyqtar engizetilýde
Bıyldan bastap birinshi synyp oqýshylary bir tilde ǵana bilim alady. Bul týraly Oqý-aǵartý mınıstri Asqat Aımaǵambetov Túrkistan oblysynyń turǵyndarymen kezdesýde aıtty, dep habarlaıdy Almaty-akshamy.kz QazAqparat-qa silteme jasap.
Mınıstr 1 qyrkúıekten bastap bilim salasyna engizetiletin jańalyqtardy atap ótti. Iaǵnı, bıylǵy oqý jylynan bastap qazaq mektebiniń birinshi synybyna barǵan balalar tek qazaq tilinde bilim alady.
«Munyń aldynda birinshi synypqa barǵan bala aǵylshyn tiliniń álippesin oqý kerek boldy. Orys tiliniń álippesin, qazaq tiliniń álippesin oqý kerek boldy. Bul 6 jastaǵy bala úshin qıyn. Balany damytý úshin ana tilin úıretip alǵan óte mańyzdy. Biz sol sheshimdi qabyldadyq. Bıyldan bastap qazaq tildi mektepke barǵan balalar, tek qaza tilinde jazyp, úırenetin bolady» - dedi, Asqat Aımaǵambetov.
Sondaı-aq, mınıstr pedagogtardyń mártebesin kóterý baǵytynda atqarylyp jatqan jumystardyń nátıje bere bastaǵanyn jetkizdi.
«Muǵalimderdi ózderine tán emes jumystardan bosattyq. Jalaqysy ósti. Qazir bul másele negizinde sheshildi. Sonyń ishinde ártúrli qujat, ártúrli esep tapsyrý boıynsha úlken problema boldy. Jalpy men qol qoıǵan buıryq boıynsha pedagog birinshiden kúndelikti elektrondy jýrnalǵa baǵa qoıady. Ekinshisi kúndelikti oqý josparyn daıyndaıdy. Bitti, basqa eshteńe bolmaýy kerek. Kimde-kim osy buıryqty buzatyn bolsa, onda biz olardy qatań jaýapkershilikke tartamyz. Aldyńǵy jyly osy baǵytta 700-ge jýyq adam túrli jaýapkershilikke tartyldy», - dedi mınıstr.