Maqsat – zeınet jasyna taqaǵan jáne zeınettegi kisilerge qoldaý kórsetý, qarjylyq saýattylyǵyn arttyrý.
Bul týraly Ǵylym jáne joǵary bilim mınıstri Saıasat Nurbek aıtyp berdi, dep habarlaıdy Almaty-akshamy.kz QazAqparatqa silteme jasap.
«Qazir otandyq JOO arasynda «Kúmis ýnıversıtet» degen joba bar. Atalǵan joba byltyr Sh. Ýálıhanov atyndaǵy Kókshetaý memlekettik ýnıversıtetinde pılottyq rejımde iske qosylǵan edi. Demek, ýnıversıtet qabyrǵasynda zeınet jasyna taıaǵan jáne zeınet jasyndaǵy kisilerge arnalǵan ortalyq ashyldy. Ol jerde ómirde túrli jaıttarǵa tap bolǵan egde jastaǵy azamattarǵa kómek, qoldaý usynylady», - dedi Saıasat Nurbek elordada ótken elektrondyq komersıa mektebiniń jumys qorytyndysyna arnalǵan shara barysynda.
Vedomstvo basshysynyń aıtýynsha, atalǵan joba pılottyq rejımde sátti júzege asyryldy.
«Bıyl 70 joǵary oqý ornynyń bazasynda «Kúmis ýnıversıtet» ortalyǵy ashylady. Osy kúnge deıin 2 myńdaı adam ortalyq kýrsynan ótti. Atalǵan is-shara ýnıversıtetterdiń úshinshi mısıasy bolyp sanalady. JOO-nyń alǵashqy mısıasy – bilim berý, ekinshi – ǵylym jáne sońǵysy – óńirdiń áleýmettik damýyna úlesi qosý», - deıdi mınıstr.
Saıasat Nurbektiń aıtýynsha, atalǵan bastamany barlyq rektorlar qoldap otyr.