Basty másele - qala oqýshylarynyń qaýipsizdigin qamtamasyz etý.
Qalalyq sanıtarlyq-epıdemıologıalyq baqylaý departamentiniń basshysy Jandarbek Bekshın Almatyda mektep oqýshylarynyń oflaın rejımde oqýynyń qaýipsizdigin qamtamasyz etý jóninde qabyldanǵan sharalar týraly aıtty, dep habarlaıdy Almaty-akshamy.kz.
«Biz Memleket basshysynyń oqýshylardyń oflaın rejımde oqýlary tıis degen tapsyrmasyn oryndaýǵa mindettimiz. Ol úshin qaýipsiz jaǵdaılardy qamtamasyz etýimiz kerek. Biz sol úshin jumys istep jatyrmyz», - dedi Almaty qalasy SEBD basshysy.
Jandarbek Bekshın, birinshiden, megapolıstiń barlyq mektepterinde Ashyq jobasyn engiziletinin aıtty. Bul oqý oryndaryna dert juqtyrǵan nemese KVI-men aýyrǵandarmen baılanysta bolǵandardyń kirýine jol bermeý úshin jasalady. Búginde «Atameken» aýmaqtyq palatasynyń aqparaty boıynsha, mektepter men mektepke deıingi mekemelerdiń 100%-y QR-kodyn aldy jáne 1 qyrkúıekten bastap Ashyq-ta jumys jasaýǵa daıyn.
«Qorǵanýdyń ekinshi jelisi – oqýshylar jınalatyn oryndarda – asqanalarda, jýynatyn bólmelerde resırkýlátorlardy engizý. Biz bul máseleni mektep ákimshiligimen qarastyryp, ata-analar komıtetimen talqylaıtyn bolamyz. Úshinshi jeli – synyptarda aýany tazartatyn dezoratorlardy ornatý. Bul japondyq ınovasıalyq qurylǵy. Qurylǵylar Qazaqstanǵa jetkizildi. Dezınfeksıa quraldary Densaýlyq saqtaý mınıstrliginiń Sanıtarlyq-epıdemıologıalyq baqylaý komıtetinde sertıfıkattalǵan, synalǵan jáne tirkelgen. Eger bul baǵdarlama maquldansa, ony engizetin bolamyz», - dedi Almaty qalasynyń bas sanıtarlyq dárigeri.
Atalǵan vedomstvo jumysyndaǵy basty másele - qala oqýshylarynyń qaýipsizdigin qamtamasyz etý ekenin erekshe atap ótti.
«Biz balalarymyzdyń qaýipsiz ortada oqýyna muqıat daıyndalýdamyz. Al biz olarǵa bıyl oflaın rejımde bilim berýimiz kerek. Bir jyldan beri balalar qashyqtan oqydy jáne bul, árıne, bilim sapasyna áser etedi», - dep qosty Jandarbek Bekshın.
Stýdentterge keletin bolsaq, Almaty qalalyq SEBD basshysy qalanyń joǵary oqý oryndary men kolejder oqytýshylarynyń joǵary deńgeıde vaksınalanǵanyn habarlady. Sondaı-aq, joǵary jáne orta arnaýly oqý oryndaryna Ashyq júıesin engizý týraly másele qoıylady. Jandarbek Bekshın stýdentter arasynda vaksınasıa boıynsha túsindirý jumystary júrgizilip jatqanyn atap ótti.
«Stýdentter de onlaın oqýdan mezi boldy. Biraq olardy tolyqtaı qamtamasyz etý úshin barlyq talaptardy oryndap, mektepterde ǵana emes, qalanyń kolejderi men joǵary oqý oryndarynda da qaýipsiz bilim alýǵa jaǵdaı jasaý qajet», - dedi Almaty qalasynyń bas sanıtarlyq dárigeri.