Ádilet departamenti 2025 jyldyń birinshi jartyjyldyǵynyń qorytyndysyn jarıalady.
Azamattyq aktilerdiń jalpy sany azaıǵanyna qaramastan, statısıka qyzyqty ózgeristerdi kórsetip, Ádilet mınıstrliginiń chat-boty sıaqty sıfrlyq sheshimderdiń engizilýi halyqqa quqyqtyq kómektiń qoljetimdiligin arttyryp otyr.
Almaty qalasy Ádilet departamentiniń basshysy Balaıym Kesebaeva Óńirlik komýnıkasıalar qyzmetiniń alańynda demografıalyq statısıka týraly jan-jaqty baıandady.
Almatyda qazir 101 057 azamattyq akt tirkelgen, bul 2024 jylǵy osy ýaqytpen salystyrǵanda 39,46%-ǵa az (2024 jyly 140 939 akt tirkelgen). Soǵan qaramastan, keıbir kategorıada oń ózgeris bar. Mysaly, týý deńgeıi 4,08%-ǵa ósip, 25 718 týý aktisi tirkelgen (2024 jyly 24 667 akt bolǵan). Ólim kórsetkishi kerisinshe 10,2%-ǵa tómendedi. Nekege turý da 3,8%-ǵa sál azaıǵan (2025 jyly 9 274 neke, 2024 jyly 9 627 neke), al ajyrasqandardyń sany aıtarlyqtaı ósip, 41,6%-ǵa kóbeıgen. 2 384 ajyrasý aktisi tirkelipti.
Ákimshilik tájirıbe boıynsha, 2025 jyly 269 boryshker jaýapqa tartyldy, 2024 jyly olardyń sany 168 bolǵan. Jalpy is sanynan 14 is memlekettik sot oryndaýshylarynyń materıaly boıynsha (2024 jyly – 23), 158 is jeke sot oryndaýshylarynyń materıaly boıynsha (2024 jyly – 100) túsken. 8 ákimshilik qamaý sharasy qoldanylyp (2024 jyly – 26), 255 ákimshilik aıyppul salyndy. Sonymen qatar 7 qylmystyq is tirkeldi.
Alıment tóleýden qashqandardyń sany da edáýir ósken: 209 boryshker jaýapqa tartyldy, ótken jyly olardyń sany bar-joǵy 61 bolǵan.
2025 jyly Almaty qalasynyń jeke sot oryndaýshylary alıment óndirý boıynsha 21 346 atqarýshylyq is júrgizgen (2024 jyly - 20 441). Onyń ishinde 2 168 is aıaqtalǵan, al maýsym aıynyń sońyna qaraı atqarýshylyq qujattardyń qaldyǵy 19 338 bolǵan.
Alıment boıynsha bereshegi bar boryshkerlerge qatysty Qazaqstan Respýblıkasynan tys jerlerge ýaqytsha shyǵýǵa shekteý qoıý týraly 4 910 qaýly shyǵarylǵan. Alty aı ishinde jeke sot oryndaýshylary alıment alýshylardyń paıdasyna 600 mıllıon teńgeden astam qarajat óndirip aldy (naqty soma - 651 513 754 teńge).
Sondaı-aq boryshkerlerdiń múlki anyqtalyp, qaryzdy óteý úshin 6 avtokólik pen 11 jyljymaıtyn múlik nysany satyldy. Boryshkerlerdi izdestirgen 427 is toqtatylyp, 198 adam ákimshilik jaýapkershilikke tartyldy.
Sıfrlandyrý salasynda, 2024 jyldyń mamyr aıynan bastap Qazaqstan Respýblıkasynyń Ádilet mınıstrliginiń resmı saıtynda chat-bot – vırtýaldy keńesshi jumys isteı bastady. Ol azamattarǵa táýlik boıy quqyqtyq aqparat berip otyrady. Chat-bot alıment, senimhat alý, sottylyqsyzdyq týraly anyqtama alý, neke buzý, muragerlik rásimder men basqa da ózekti máseleler boıynsha kómek kórsetedi. Sonymen qatar, bot olardy tıisti memlekettik organdarǵa, elektrondy qyzmetterge baǵyttaıdy.
Chat-bot iske qosylǵaly beri qala turǵyndarymen alty aqparattyq kezdesý ótip, 4 751 adam quqyqtyq kómek alý úshin sıfrlyq kómekshini paıdalanýǵa baǵyttaldy. Saıtqa 4 829 habarlama kelip túsip, onyń 1 146-sy keri baılanys boldy.
Sıfrlyq tehnologıalar men halyqpen belsendi jumys isteýdiń arqasynda ádilet salasy halyqqa jaqyndap keledi.