Ádilet departamenti 2025 jyldyń birinshi jartyjyldyǵynda júrgizilgen baqylaý men qadaǵalaý jumysynyń qorytyndysyn shyǵardy.
Notarıýstar, advokattar, quqyqtyq konsýltanttar qyzmeti men halyqqa kórsetiletin memlekettik qyzmettiń sapasy basty nazarda boldy. Statısıkaǵa qaraǵanda, tekserý jaǵy qataıyp, azamattardyń shaǵymdary da úzbeı qaralyp, zań buzýshylyqtyń jolyn kese bastaǵan. Óńirlik komýnıkasıalar qyzmetinde Ádilet departamentiniń basshysy Balaıym Kesebaeva osylaı dedi.
Almatyda qazir 964 notarıýs jumys isteıdi. Alaıda olardyń bári birdeı zańdy saqtaı bermeıdi. Osy kezeńde notarıýstardyń áreketine qatysty 419 shaǵym túsken. Onyń 27-si rastalypty. 4 notarıýstyń lısenzıasy toqtatylyp, taǵy 8 adam tártiptik jaýapkershilikke tartylǵan. Lısenzıadan aıyrý týraly is qozǵalyp, notarıýstardyń óz ótinishi boıynsha lısenzıasyn toqtatqan. Bir notarıýs sot sheshimimen lısenzıasynan aıyrylǵan, biraq bul sheshim áli kúshine engen joq.
Sonymen qatar, notarıýstardyń 23-ine notarıaldyq qyzmetterdi oryndaý kezinde zań buzýshylyq jasaǵany úshin ákimshilik is qozǵaldy. Byltyr mundaı istiń sany 18 bolǵan.
Almatyda advokattar sany sol kúıi 1100 adam bolyp qaldy. Olarǵa bar bolǵany 11-aq shaǵym túskenimen, bireýine tártiptik jaza qoldanyldy. Jeke sot sheshimi boıynsha taǵy bir advokat aıyptalyp, sógis aldy, bir is zań buzbaǵanyna baılanysty toqtatyldy. Sot sheshimimen úsh advokat lısenzıasynan aıyrylyp, taǵy eki advokat basqa sebeppen jumysyn toqtatty.
Quqyqtyq konsýltanttarǵa qatysty 75 shaǵym túsip, onyń 3-i ǵana rastaldy. Eskertý, sógis berilip, bir konsýltant Palatadan shyǵaryldy. Jeke sot sheshimi boıynsha taǵy úsh konsýltant jaýapkershilikke tartylyp, bireýi uıymnyń músheliginen shyǵaryldy.
Baqylaý jumystary halyqqa qyzmet kórsetý ortalyqtarynyń qyzmetin de qamtydy. Almatyda «Azamattarǵa arnalǵan úkimet» memlekettik korporasıasynyń fılıaldaryna birneshe josparly jáne jospardan tys tekserý júrgizdi. Onyń bireýi jyljymaıtyn múlik tirkeý salasyna qatysty bolyp, 106 buzýshylyq anyqtaldy. Materıaldar tirkeý organyna jiberilip, kemshilikterdi joıyp, bolashaqta mundaı jaǵdaıdyń qaıtalanbaýyn qamtamasyz etý talap etildi. Azamattyq jaǵdaı aktilerin tirkeý boıynsha da osyndaı tekserý júrgizildi. Bul salada buzýshylyq az, bar bolǵany beseý.
Jalpy alǵanda, baqylaý organdary quqyqtyq qyzmetterdiń sapasy men tirkeý rásimderin baqylaýdy kúsheıtip jatyr. Ár zań buzýshylyqqa eskertý men sógisten berýden bastap lısenzıadan aıyrýǵa deıingi shara qoldanylady. Bul zańgerlerge ǵana emes, quqyq salasynda jumys isteıtin barlyq mamandarǵa eskertý. Qaı-qaısysy bolsyn erejeni saqtap, zań sheńberinde sapaly qyzmet kórsetýi tıis.