2025 jyldyń basynan beri Almatyda turatyn 380 myńnan astam jas komúnıtı ortalyqtardyń qyzmetin paıdalandy.
Bul 14 pen 35 jas aralyǵyndaǵy jastarǵa arnalǵan zamanaýı keńistikter, munda olar bilim alyp, jumysqa ornalasyp, áleýmettik jáne psıhologıalyq qoldaý ala alady, - dep habarlaıdy Aqshamnews.kz.
Bul týraly Almaty qalasy Jastar saıasaty basqarmasy habarlady.
Osy kezeńde ortalyqtarda 1,6 myńnan astam is-shara ótkizildi. Jastar qala ómiriniń mádenı, bilim berý, ekologıalyq jáne eriktilik baǵyttaryna belsendi qatysyp keledi. Ár aýdanda jergilikti jastardyń qyzyǵýshylyǵy men kózqarasyn kórsetetin jeke komúnıtı qurylyp keledi. NEET sanatyndaǵy (oqymaıtyn jáne jumys istemeıtin) jastarǵa erekshe kóńil bólingen.
Máselen, bıyl 6,2 myńnan astam adamǵa eńbekke ornalasý jóninde keńes berilip, 3,9 myńnan astam jas turaqty jumysqa turdy. Sondaı-aq, 1 myńǵa jýyq jasqa psıhologıalyq, al 1,3 myńnan astam ótinish boıynsha zańgerlik kómek kórsetildi.
Komúnıtı ortalyqtardyń jumysy júıeli túrde uıymdastyrylǵan: jastardyń áleýeti baǵalanyp, jeke damý baǵyty aıqyndalady, oqý men tálimgerlik baǵdarlamalarǵa jáne ári qaraı jumysqa ornalasýǵa múmkindik beriledi. Ár ortalyq óz aýdanynyń ereksheligi men jastardyń suranysyna saı jobalardy júzege asyrady.
Qalalyq jastar saıasaty basqarmasynyń málimetinshe, jyl sońyna deıin ár aýdanda ekiden ortalyq ashylyp, olardyń jalpy sany artady.
Búginde Almatyda qala ákimdiginiń jobalyq keńsesiniń qoldaýymen 11 komúnıtı ortalyq jumys isteıdi. Bul jaı ǵana kovorkıngter emes, jastardyń pikir almasyp, múmkindigin damytyp, kómek ala alatyn ortalyq alańdary. Munda psıhologıalyq jáne zańgerlik keńes alyp, kásibı baǵdardan ótip, túrli sheberdiń dárisine, trenıń jáne zıatkerlik oıyndarǵa qatysýǵa bolady.