Bıyl 3,1 mıllıonnan astam oqýshy jazǵy demalysty paıdaly ótkizedi

Qazaqstan Respýblıkasynyń Oqý-aǵartý mınıstrligi jazǵy maýsymǵa daıyndyq jumystaryn bastady.

2025 jylǵy jaz mezgilinde elimiz boıynsha 3,1 mıllıonnan astam bala saýyqtyrý, demalys jáne jumyspen qamtýǵa baǵyttalǵan túrli baǵdarlamalarmen qamtylatyn bolady. Onyń ishinde 500 myńnan astamy – áleýmettik osal sanattaǵy balalar. «Qazaqstan halqyna» qorynyń qoldaýymen 10 myń bala jazǵy demalysyn tegin ótkizý múmkindigine ıe bolady, dep habarlaıdy aqshamnews.kz sala mınıstrligine silteme jasap. 

Jazǵy demalys baǵdarlamasy ártúrli baǵyttardy qamtıdy: eńbek jáne shyǵarmashylyq belsendilik, týrısik jáne tanymdyq marshrýttar, zıatkerlik ári bilim berý is-sharalary, sondaı-aq halyqaralyq jobalar men forýmdarǵa qatysý.

Barlyq uıymdastyrý sharalary 9 memlekettik organnyń qatysýymen ázirlengen biryńǵaı jospar aıasynda iske asyrylady. Osy maqsatta respýblıkalyq jáne óńirlik deńgeıdegi shtabtar qurylyp, aǵymdaǵy jyly jumysyn bastaıtyn demalys ortalyqtarynyń tizimi jasaqtaldy.

Balalardyń qaýipsizdigin qamtamasyz etýge erekshe kóńil bólinýde. Sanıtarlyq talaptardyń saqtalýy, taǵam qaýipsizdigi, sondaı-aq sý aıdyndarynda, ormandar men sport nysandarynda saqtyq sharalary qatań baqylaýda bolady.

Qaýipsiz ári belsendi jazǵy demalys mádenıetin qalyptastyrý maqsatynda arnaıy jadynamalar, nusqaýlyqtar men gaıdbýktar ázirlenip, balalar men ata-analarǵa taratylatyn bolady. Óńirlerde «Kıeli shyǵys», «Uly Dala keremeti», «Jas galym», «Gastro týrızm», «Qonaqjaı otbasy» syndy biregeı jobalar iske asyrylady.

Bıyl jyl boıy jumys isteıtin 16 lager, 188 maýsymdyq lager, 10 myńnan astam mektep janyndaǵy lager, onyń ishinde birqatarynda tamaqtandyrý qarastyrylǵan, sondaı-aq 512 shatyrly jáne kıiz úı lagerleri kezeń-kezeńimen ashylady dep josparlanýda.