2022 jyldyń qorytyndysy boıynsha birneshe mınıstrlik memlekettik búdjet qarajatyn tıisti deńgeıde ıgermegen, dep habarlaıdy Almaty-akshamy.kz QazAqparatqa silteme jasap.
«Memlekettik búdjettiń shyǵysy 98%-dy, respýblıkalyq búdjet shyǵystary 98,6%-dy jáne jergilikti búdjettiń shyǵysy 96,4%-dy qurady. Respýblıkalyq búdjet boıynsha 18,5 trln teńge somasyna shyǵystar júrgizildi. Ótken jyly 263 mlrd teńge atqarylmaǵan. Onyń ishinde 175 mlrd teńge - Úkimettiń bólinbegen rezervi, 7 mlrd teńge únemdelgen. Bul shyǵystar búdjet kodeksine sáıkes ıgerilmegen qarajat bolyp eseptelmeıdi. Sol sebepti, shyǵystardy taza ıgerý 99,6% quraıdy dep aıtýǵa negiz bar», - dedi Premer-Mınıstrdiń orynbasary – Qarjy mınıstri Erulan Jamaýbaev Úkimet otyrysynda.
Sondaı-aq, Premer-Mınıstrdiń orynbasary búdjet qarjysyn durys ıgermegen mınıstrlikterdi atap ótti.
«Búdjetti nashar ıgerý boıynsha, ıaǵnı 99%-ten tómen kórsetkish Saýda jáne ıntegrasıa, Sıfrlyq damý, ınovasıalar jáne aeroǵarysh ónerkásibi, Tótenshe jaǵdaılar, Mádenıet jáne sport mınıstrlikterine tıesili. Igerilmeýdiń negizgi sebepteri - ónim berýshilerdiń shart talaptaryn buzýy, jobalaý-smetalyq qujattamalarǵa memlekettik saraptamany uzaq ótkizý nemese oǵan oń qorytyndynyń bolmaýy, oryndalǵan jumystar aktilerin, shot-faktýralardy ýaqtyly usynbaý», - deıdi ol.