Prezıdent Qasym-Jomart Toqaev Parlamenttik reforma jónindegi Jumys tobynyń birinshi otyrysynda sóz sóıledi, - dep habarlaıdy aqshamnews.kz tilshisi.
"Barshańyzǵa málim, elimizde túrli baǵytta aýqymdy ózgerister jasalýda. Bir el bolyp saıası, áleýmettik-ekonomıkalyq reformalardy júzege asyryp jatyrmyz. Osy ózgerister jalǵasyn tabýy kerek. Bir orynda turyp qalýǵa bolmaıdy", - dedi Prezıdent.
Memleketimizdi túbegeıli jańǵyrtý strategıasyn "Kúshti Prezıdent – yqpaldy Parlament – esep beretin Úkimet" tujyrymdamasyna saı júrgize berý mańyzdy. Bul – elimizde Prezıdenttik bılik júıesiniń tıimdiligi saqtalady degen sóz.
"Jalpy, bir palataly Parlamentke kóshý halyqaralyq úrdiske tolyq saı keledi. Álem elderiniń úshten ekisinde osyndaı parlamenttik júıe qalyptasqan. Dál qazir bizge keregi – ortaq ustanym jáne parasatty, salmaqty usynys. Sondyqtan barlyq oı-pikirdi, usynysty muqıat zertteımiz, egjeı-tegjeıli qaraımyz", - dedi Memleket basshysy.