Bılikte de «otbasylyq júıe» joq

Azamattardy qyzmetke taǵaıyndaý kezinde eń aldymen olardyń bilimi men kásibı biligi eskeriledi, dedi Memleket basshysy.

«Biz bir el, bir halyq bolyp, Ádiletti, Taza ári Qýatty Qazaqstandy quryp jatyrmyz. Ulttyń jańa sapasyn qalyptastyrý úshin naqty reformalardy qolǵa aldyq. Bul – aýqymdy ári kúrdeli jumys. Búginge deıin biraz sharýa atqaryldy. Eldegi saıası júıe tolyq jańǵyrdy. Ulttyq ekonomıkanyń jańa baǵdary aıqyndaldy. Qoǵamymyz damyp, azamattardyń sana-sezimi ózgerýde.

Memlekettik qyzmette merıtokratıa qaǵıdaty basty orynǵa shyqty. Bılikte de «otbasylyq júıe» joq. Azamattardy qyzmetke taǵaıyndaý kezinde eń aldymen olardyń bilimi men kásibı biligi eskeriledi.

Qazir elimizde rýhy azat, oıy erkin urpaq ósip keledi. Zańdy syılaý, tártipke baǵyný qoǵamnyń myzǵymas qaǵıdasyna aınala bastady. Bir sózben aıtqanda, Qazaqstan jańa sıpatty el bolý jolyna bet burdy.

Biraq ózgeristerdi jasaý – bir bólek bolsa, ony birjola ornyqtyrý – bir basqa másele. Ol úshin, eń aldymen, qoǵam sanasy túbegeıli jańǵyrýy qajet. Osy rette sizderge, ıaǵnı ustazdar qaýymyna zor jaýapkershilik júkteledi. Sebebi, naǵyz «Adal azamat» mektep qabyrǵasynda qalyptasady».