"Bíz órkenıettí el bolamyz desek, ūstazdarǵa barynsha jaǵdaı jasauymyz kerek", dedí Prezıdent tamyz konferentsıyasynda.
Men bílím beru salasyna aıryqsha mán beremín. 2019 jyly Prezıdent retínde qabyldaǵan alǵashqy sheshímderdíń bírí ūstazdarǵa qatysty bolǵanyn bílesízder.
Qazír – bílím men ǵylymnyń zamany. Jahandanu dáuírínde ozyq bílímdí ıgergen, jańa tehnologıyany meńgergen eldíń ūpaıy túgel bolady. Búgín sanaly ūrpaq tárbıeleı alsaq, erteń zaman kóshíníń basynda júremíz. Sondyqtan osy salany qoldau memlekettík sayasattyń negízgí basymdyǵy bolyp qala beredí.
Sońǵy jyldary būl baǵytta auqymdy jūmys atqaryldy. 2019 jyldan berí bílím salasynyń byudjetí úsh ese artty. Osy uaqytta 1 mıllıonnan astam oqushyǵa arnalǵan 1200 mektep ashyldy. «Keleshek mektepterí» ūlttyq jobasy ayasynda jalpy sany 217 mektep qūrylysy josparlandy. Qazír 128 mektep salyndy. Būdan bólek, Bílím beru ınfraqūrylymyn qoldau qorynyń qarjysyna alpystan astam mektep salyndy. Taǵy 30-ǵa juyǵy salynyp jatyr.
«Pedagog mártebesí turaly» arnaıy zań qabyldandy. «Qazaqstannyń eńbek síńírgen ūstazy» ataǵy belgílendí. Búgínde 74 mūǵalím osy qūrmettí ataqqa ıe boldy. Byltyr 2 ūstaz «Qazaqstannyń Eńbek Erí» atandy. Būl – barsha pedagogter qauymyna kórsetílgen zor qūrmettíń belgísí.
Mūǵalímderdíń áleumettík jaǵdaıyn jaqsartu árdaıym basty nazarda. Sońǵy tórt jyldyń íshínde olardyń jalaqysy 2 ese óstí. Qazírgí tańda 500 myńnan astam ūstazǵa ústeme aqy tólenedí. «Bílím berudegí ózgerísterdíń myń kóshbasshysy» jobasy qolǵa alyndy. Osy jobaǵa qatysqan 332 maman mektep dırektory bolyp taǵaıyndaldy. Mūǵalímder óz míndetíne kírmeıtín artyq jūmystan bosatyldy. Ūstazdyń nazary bala oqytu ísínde boluǵa tıís».
Ūstazdardyń jalaqysy ekí ese óstí
