Álbette men ataýyna qatty másele qoıyp turǵan joqpyn. Buryn bilesiz, partıanyń «Otan» degen jaqsy aty bolatyn. Keıin ony Nur Otan dep ózgertti. Endi Amanat atalyp jatyr.
Negizi, "amanat" degen qazaqta óte qasterli sóz. Bul partıa endi bastyqtardyń partıasy emes, qarapaıym halyqtyń partıasy bolsyn degen tilek qoıamyn. Bylaı qarap tursańyz, buryn Nur Otan partıasyn halyq tek sheneýnikter men ákimderdiń partıasy sıaqty qabyldaıtyn edi.
Partıa degenimiz tek bir kategorıanyń partıasy bolmaýy kerek. Ol búkil halyqtyń partıasy bolýy tıis. Sondyqtan "Amanat" partıasy qarapaıym halyqtyń amanaty bolsyn ári bul partıa ár aýylda, ár kishkentaı qalada bolýy kerek. Sonymen qatar tek qana esep, ádemi beıne úshin ǵana emes, halyq úshin kádimgideı jumys istep, halyqpen kezdesip, ózderiniń jıynyna qarapaıym halyqty da kirgizýi kerek.
Búkil saıası partıalar osyndaı baǵytta jumys isteýi qajet. Partıanyń birinshi maqsaty – halyqtyń ıgiligi úshin onyń quqyn qorǵap, halyqtyń máselesin sheshetin partıa bolýy tıis. Men tek bir partıanyń domınantty bolǵanyn qalamaımyn. Buryn Nur Otan partıasynyń músheleri Parlamenttiń jartysyna jýyǵyn alatyn da, basqa partıalar óte az bolatyn.
Biz qazir bir mandattyq saılaýdy qoldaýymyz kerek jáne basqa da partıalarǵa múmkindik berýimiz kerek. Tirkelmegen partıalar qanshama, mine, solarǵa da jol berilgeni jaqsy. Sondyqtan "Amanattyń" taǵy da bir amanaty – osy tirkelmegen partıa, uıymdarmen birge jumys istep, Qazaqstannyń damýyna birge áreket jasaýyn kútemin.
Partıalardy memlekettiń qarjylandyrýyn múldem túsine almaımyn. Dúnıejúzinde ol joq nárse. Ár partıa ózi qarjy kózin tabýy kerek. Partıalarǵa búdjetten aqsha alýdy doǵarǵan jón.
Jazyp alyp, daıyndaǵan Ásel Daǵjan.