Qazaqstanda áleýmettik máni bar aýrýlardy erte dıagnostıkalaýǵa jáne medısına qyzmetkerlerin qoldaýǵa baǵyttalǵan densaýlyq saqtaýdaǵy basym JI-jobalardyń tizimi jasaldy, - dep habarlaıdy aqshamnews.kz.
Negizgi baǵyttardyń qataryna ınsýlt, ókpe jáne sút bezi obyryn erte dıagnostıkalaý, sondaı-aq jasandy ıntellektti qoldana otyryp, stomatologıalyq sýretterdi taldaý jatady. Bul sheshimder qazirdiń ózinde praktıkalyq densaýlyq saqtaý salasynda engizilip, keńeıtilýde
Búgingi tańda otandyq medısına mamandary túrli JI-servısterdi belsendi qoldanady. Osylaısha, Cerebra 5 óńirdegi II jáne III sanattaǵy 9 ınsýlt ortalyǵynda qoldanylady, WDsoft sheshimi 10 óńirdegi 190 medısınalyq uıymda qoldanylady, AIDENTIS platformasy 65 stomatologıalyq klınıkada jáne 3 medısınalyq JOO-da engizildi. ALIMA medısına qyzmetkeriniń JI-assıstenti búkil el boıynsha 700-den astam emhanada qoldanylady.
Respýblıkalyq elektrondyq densaýlyq saqtaý ortalyǵy kórsetilgen medısınalyq qyzmetterdiń avtomattandyrylǵan monıtorıńi, klınıkalyq sheshimder qabyldaýdy qoldaý, dáriger men pasıentti habardar ete otyryp, zerthanalyq taldaýlardaǵy aýytqýlardy anyqtaý, sondaı-aq medısınalyq uıymdar men suranys boıynsha mamandar týraly ózekti aqparatty usyný úshin AI-agentterin pysyqtaýda.
Jobalardy iske asyrý 8 grafıkalyq prosesordy qosa alǵanda, bólingenJISDM esepteý resýrstaryn paıdalana otyryp, sondaı-aq API-ınterfeısterge qol jetkizýdi qamtamasyz etý arqyly júzege asyrylady.
Keleshekte SmartEKG sheshimderiniń negizinde dárilik zattar men medısınalyq buıymdarǵa saraptama júrgizý, sozylmaly júrek jetkiliksizdigin erte anyqtaý boıynsha jobalardy engizý úshin JI-quraldaryn engizý josparlanýda.