Beıjiń Olımpıadasynda qazaqstandyq mogýlshylar alǵashqy irikteý kezeńin ótkizdi
Jarysty aldymen áıelder bastady, dep habarlaıdy Almaty-akshamy.kz Olympic.kz-ke silteme jasap.
Birinshi irikteý kezeńinen soń fınalǵa shyǵý múmkin bolmady. Otandyq mogýlshylar alǵashqy ondyq qataryna ene almady. Aıaýlym Ámirenova 16-shy, Olesá Graýr 23-shi orynda. Anastasıa Gorodko jarys jolynan shyǵyp ketkendikten, fınalǵa óte almady. Endi olar 6 aqpan kúni ótetin ekinshi irikteý synyna qatysady.
«Birinshi tramplınnen sekirgen soń qate jiberdim. Dese de, bári jaman dep aıta almaımyn. Olımpıada merekesi sezilip tur, kóńil-kúıim jaqsy», - dedi Olesá Graýr.
«Búgingi kórsetkishim jaman emes. Biraq budan da jaqsy nátıje kórsetetin múmkindik bar edi. Áli berilmeımiz, ekinshi kezeń bar», - deıdi Aıaýlym Ámirenova.
«Qobaljý bolǵan sıaqty. Sekirý de, basqasy da oıdaǵydaı shyqqan joq», - dedi Anastasıa Gorodko.
Beıjiń Olımpıadasynyń alǵashqy jarys kúninde frıstaıl-mogýldan erler arasyndaǵy irikteý syny aıaqtaldy.
Birinshi irikteý aınalymynda qazaqstandyq sportshylar alǵashqy ondyqqa engen joq. Dmıtrıı Reıherd 75.43 upaımen 12-oryn aldy.
Pavel Kolmakov 74.09 upaımen 17-orynda. Eki sportshymyz da 5 aqpan kúni ótetin irikteý kezeńiniń ekinshi aınalymynda synǵa túsedi.
İrikteý kezeńiniń qorytyndysy boıynsha alǵashqy ondyqqa engen mogýlshylar fınalǵa birden joldama aldy. Kanadalyq Mıkael Kıngsberı 81.15 upaımen kósh bastap keledi.