Almaty qalasy Naýryzbaı aýdany ákimdiginde turǵyn úı sharýashylyǵyn damytý máseleleri boıynsha jıyn ótti.
Jıynda kóppáterli jáne kópqabatty turǵyn úılerdi basqarý júıesinde eleýli ózgerister bolatyny aıtyldy.
Memleket basshysy «Qazaqstan Respýblıkasynyń keıbir zańnamalyq aktilerine turǵyn úı-kommýnaldyq sharýashylyq, kásipkerlik jáne eksporttyq-kredıttik agenttiktiń qyzmeti máseleleri boıynsha ózgerister men tolyqtyrýlar engizý týraly» Zańǵa qol qoıdy.
Buǵan deıin qoldanylyp kelgen qarapaıym seriktestik nysany joıyldy. Endi tek eki basqarý túri qalady: Múlik ıeleri birlestigi (MIB), Tikeleı birlesip basqarý (TBB). Páter ıeleri kooperatıvteriniń (PIK) mártebesi basqarý sýbektisi retinde tanylyp, basqarýshy kompanıalarmen teńestiriledi. Olar MIB-pen shart negizinde nemese turǵyndardyń jalpy jınalysy hattamasyna sáıkes jumys isteıdi.
Árbir úı úshin jeke banktik shot ashý mindetteledi.
Shot ashý jáne esep berý merzimderin buzǵandarǵa jaýapkershilik kúsheıtiledi. MIB, PIK jáne basqarýshy kompanıalar úıdiń ortaq múlkin basqarý men kútip-ustaý qyzmetterin qatar atqara alady.
Jalpy jınalys ótkizbeı-aq, elektrondy daýys berý nemese jazbasha saýalnama arqyly sheshim qabyldaýǵa múmkindik beriledi.
Turǵyn úı zańnamasyn buzǵan basqarýshy tulǵalarǵa jeke ákimshilik jaýapkershilik engiziledi.
Bul ózgerister tek turǵyn úı zańnamasyna ǵana emes, sonymen birge Jer, Kásipkerlik, Azamattyq is júrgizý, Áleýmettik jáne Sý kodeksterine, sondaı-aq 23 zańǵa túzetýler engizýdi qamtıdy. Jekelegen túzetýler salyqtyq ákimshilendirý jáne jappaı deklarasıalaýdan bas tartý máselelerine qatysty.
Jańa zań kóppáterli turǵyn úılerdi basqarýda tıimdilikti, ashyqtyqty jáne jaýapkershilikti arttyryp, azamattardyń quqyqtary men múddelerin qorǵaýǵa baǵyttalǵan.
Almaty qalasy Komýnaldyq ınfraqurylym jáne turǵyn úı ınspeksıasy basqarmasynyń ókili Jandos Maratuly turǵyn úı saladaǵy ózgerister týraly aıtyp berdi.
– Jýyrda turǵyn úı-kommýnaldyq sharýashylyq salasyndaǵy birqatar normatıvtik aktilerge ózgerister men tolyqtyrýlar engizildi. Bul zań 15 qyrkúıekten bastap kúshine enedi. Jańa erejeler turǵyndardyń óz úılerin basqarýǵa belsendi qatysýyna múmkindik beredi. Sonymen qatar, páter ıeleri kooperatıvteri (PIK) de jumysyn jalǵastyra otyryp, jańa formatta qyzmet atqarady, – dedi ol.