Nóser tilegen kókala bas qorǵasyn bulttar shyń basyn qymtap alǵan...
Almatyda bıylǵy jaz jaýyn-shashyndy, naızaǵaıly bolyp bastalyp, aýa raıy qubylmaly qalpyn áli saqtap tur. Alataýdyń basynan bult ketpeıdi, tumshalap alǵan. Taý bókterleri men shatqaldaryn salqyn samal enshilep, túnge qaraı, ásirese tań aldynda salqyndatyp jiberedi.
«Aldaǵy aptada aptap ystyqpen birge nóserli jaýyn, ókpek jel, salqyn samal bolýy ábden múmkin. Naızaǵaı oınap, kún kúrkireýi de ǵajap emes...» degenbiz ótken jolǵy paıymymyzda. Solaı boldy da, kún kúrkirep, naızaǵaı oınady.
Búgin qoldanystaǵy kúntizbe boıynsha, shilde aıynyń 6-shy jańasy. Al «Shilde amalynyń» alǵashqy onkúndigi bitip, ekinshisi bastaldy. Tabıǵat jyrshysy İlıas Jansúgirov aqynnyń:
«Qurt, irimshik qaınaldy,
Qulyndar da baılandy.
Japyraqtar jalpaıdy,
Jas qozylar marqaıdy...», –
dep bastalatyn shilde kórinisi týraly «Jazǵy shilde» óleńiniń jazylǵan mezgili bul.
Shilde óte ystyq aı, onyń ystyǵy 40 gradýsqa jetetin bolǵandyqtan ári 40 kúnge sozylatyndyqtan, burynǵylar «qyryq kún shilde» dep ataǵan. Maýsym aıynyń 25 juldyzynan tamyz aıynyń 5 juldyzyna deıingi kezeńdi qamtıdy, aýa raıy óte ystyq bolady. Iá, bul boljam boıynsha, qazaqy paıym osylaı deıdi. Al shyn máninde áli aspan tolyq ári turaqty ashylar emes, jańbyr basylar emes.
Osy mezgildi danyshpan halqymyz «Bas shilde» dep te ataıdy. Amal kezinde qapyryq ystyq bolady. Keıbir jyldary qońyrjaı qalypta ótetin bolǵan. El arasyndaǵy aýa raıyn baqylaıtyn esepshiler, Bas shildeniń qalaı ótýine qarap, shilde aıyndaǵy kún raıyn boljaıtyn bolǵan.
Ótken jolǵy paıymymyzda sóz etkendeı, el jaılaýlarynda qulyn baılanyp, bıe saýý júrip jatyr. Qymyzdyń júz aýrýǵa em ekenin dárigerler aıtyp júr. Saýmal – sal aýrýlaryna, júrek pen asqazan jarasyna, baýyr men ókpe aýrýlaryna myń da bir shıpa. Býyn men qanazdyq dertine de daýa.
Búgin aı kúntizbesi boıynsha, ótkende týǵan aıdyń –18-i, al qoldanystaǵy kúntizbeniń tili aıdyń – 6-syn kórsetip tur, qazaqsha esepke júginsek, shilde aıy endi 9 kúnnen keıin týady. Ár aıdyń basy men ortasy jáne sońǵy kezi álbette, ózgerissiz bolmaıdy. Demek, aldaǵy aptanyń jańbyrly bolatynyn meńzep tur. Kún burynǵydan salqyndaıdy, biraq mundaı kórinis uzaqqa barmaýy tıis...