Almatyda jańartylǵan Bas jospardy engizý boıynsha júıeli jumys jasalyp jatyr, - dep habarlaıdy Aqshamnews.kz.
Bul jumys sáýlet-qala qurylysyna baqylaýdy kúsheıtýmen qatar júredi. Óńirlik komýnıkasıalar qyzmeti alańynda qala ákiminiń orynbasary Beıbit Shahanov habarlaǵandaı, qala ortasyn damytý salasyndaǵy strategıalyq sheshimder Qala qurylysy keńesi men sáýlet-qurylystyq baqylaý organdary arqyly iske asyrylady.
«Qala qurylysy keńesi – qala úshin mańyzdy jobalardy qarastyratyn alqaly konsýltatıvtik organ. Onyń quramyna táýelsiz sáýletshiler, osy salanyń mamandary kiredi, olar jobalardyń júzege asýyna qoǵamdyq baqylaý jasaıdy. Bul rette memlekettik organdardyń qala qurylysy keńesinde daýys berý quqyǵy joq», – dedi Beıbit Shahanov.
2022–2025 jyly Keńestiń 26 otyrysy ótip, 395 joba qaralǵanymen, onyń jartysy jýyǵy ǵana – 47,8%-y maquldanǵan. Jobany qaraǵan kezde qasbet sheshimine, osy zamanǵy tehnologıany qoldanýǵa, halyqtyń tyǵyzdyǵyn eskerip, sáýlettiń qorshaǵan qurylysqa saı bolýyna erekshe nazar aýdarady.
Memlekettik sáýlet-qurylys baqylaýy da asa mańyzdy baǵyttyń biri sanalady. Tek osy jyldyń ózinde 1 300-den astam jospardan tys tekserý júrgizilip, 350 mln teńgege ákimshilik aıyppul salynyp, 600-den astam zań buzýshylyqty joıý týraly nusqama berildi. Ásirese qurylys-montaj jumysynyń sapasyna, merdigerden bastap jobalaý men tehnıkalyq qadaǵalaý uıymdaryna deıingi qurylys barysyna atsalýshylardyń barlyǵynyń jaýapty bolýyna asa kóp kóńil bólingen.
«Biz qurylys-montaj jumysynyń oryndalýyna baqylaýdy kúsheıtý boıynsha júıeli jumys júrgizip jatyrmyz. Bul rette lısenzıadan aıyrý - naryqty senimsiz kompanıalardan tazartýdyń eń tıimdi joly bolyp otyr. Bıyl 5 qurylys kompanıasy qurylys júrgizý lısenzıasynan aıyrylyp, tehnıkalyq qadaǵalaý qyzmetimen aınalysatyn 2 uıymnyń akredıtasıasy toqtatyldy», – dep atap ótti ákimniń orynbasary.
Jyl basynan beri sotqa shamamen 80 talap-aryz berilip, onyń jartysy qanaǵattandyryldy. Talap-aryzdyń 42-si nysandardy tolyq nemese ishinara buzýǵa qatysty bolǵan. Jalpy qala boıynsha jyl basynan beri 38 zańsyz qurylys buzylyp, taǵy 70 nysandy aldaǵy ýaqytta buzý josparda tur.
Beıbit Shahanovtyń aıtýynsha, basty maqsat – jobalaýdan bastap nysandy paıdalanýǵa berýge deıingi ár proses zań talabymen iske asatyndaı etetin tıimdi baqylaý júıesin qalyptastyrý.