Qala ákimi Baqytjan Saǵyntaev megapolıstegi epıdemıologıalyq ahýaldyń damýy jáne jaǵdaıdy qıyndatýy múmkin jańa "omıkron" shtamynyń taralý qaýpi týraly aıtyp berdi. «Almaty» TA-daǵy Akimat Live baǵdarlamasynyń tikeleı efırinde ákim qala turǵyndardy sanıtarlyq qaýipsizdik sharalaryn saqtaýǵa shaqyrdy, dep habarlaıdy Almaty-akshamy.kz
Sońǵy 7 kúnde KVI derti ótken aptalarmen salystyrǵanda 249 oqıǵadan 223 jaǵdaıǵa deıin tómendedi, táýligine 30-35 jaǵdaı tirkeldi. Infeksıa juqtyrýdyń epıdemıologıalyq kórsetkishteri 1 naýqastan 1 adamnan az juqqanyn kórsetedi (búgingi kúngi R sany 0,8).
Aıta keterligi, jyl basynan beri qalada 164 477 KVI jáne 1 449 kovıdti pnevmonıa tirkelgen. Jeltoqsan aıynda Almatyda 1000-1300 KVI jaǵdaıy boljanýda, 22 jeltoqsanda 884 jaǵdaı tirkeldi.
Sońǵy aptada jasy boıynsha dert juqtyrǵandardyń úlesi: 20-59 jas – 55%, 60 jas jáne odan joǵary – 25%, 14 jasqa deıingi balalar - 15%, jasóspirimder 5%-dy qurady. Onyń ishinde ózin-ózi jumyspen qamtyǵan jáne jumys istemeıtin azamattar – 31%, uıym, JSHS, JK qyzmetkerleri – 21%, zeınetkerler – 20%, oqýshylar – 11%, mektep jasyna deıingi balalar – 7%, stýdentter – 3%, basqalar – 7%. Almatylyqtar dertti kóbinese qoǵamdyq kólikterde (36%), saýda nysandarynda (34%) jáne otbasylarda (25%) juqtyrady.
Búginde Almatyda KVI dertiniń tómendeýi ujymdyq ımýnıtettiń 58%-yna (vaksınalanǵandardyń 50%-y jáne jyl basynan beri aýyryp aýyrǵandardyń 8%-y) qoljetkizýdiń arqasynda múmkin boldy. Sondyqtan qala ákimi Baqytjan Saǵyntaev almatylyqtardy, onyń ishinde jasóspirimder men táýekel tobyndaǵy qalalyqtardy belsendi túrde vaksınalanýǵa shaqyrdy. Alǵashqy egýdi alǵandar dárigerler usynǵan merzimnen keıin revaksınasıadan ótýleri tıis.
Aıta keterligi, pandemıanyń jańa tolqyny álemde taralýyn jalǵastyrýda. «Omıkron» shtammy álemniń 106 elinde tirkelgen, onyń ishinde ujymdyq ımýnıtettiń joǵary deńgeıi bar – AQSH, Ulybrıtanıa, Germanıa jáne basqalarynda.
Almatyda jappaı vaksınalaný qajet, óıtkeni qalalyq sanepıdqyzmettiń taldaý toby mamandarynyń boljamy boıynsha Almatyda COVID-19 "omıkron" shtamynyń tirkelýi ábden múmkin. Epıdemıanyń kezekti tolqyny 2022 jylǵy qańtardyń ortasynda kútilýde, naýryz aıynyń ortasyna qaraı órshýi yqtımal.
Qala ákimi epıdemıologıalyq jaǵdaıy nashar elderden «omıkron» ınfeksıasynyń Qazaqstanǵa ákelinýiniń aldyn alý úshin profılaktıkalyq jumystardyń keńinen júrgizilip jatqanyn atap ótti. Máselen, 3-20 jeltoqsan aralyǵynda Almatyǵa shetelden 49,4 myń jolaýshysy bar 344 reıs qondy. Onyń ishinde PTR anyqtamalarymen 29,7 myń, vaksınalaý pasportymen 20 myń, «omıkron» shtamy tirkelgen elderden 2,9 myń jolaýshy keldi. Barlyǵy medısınalyq baqylaýǵa alynyp, 7 kún boıy oqshaýlandy. Keıinnen olardyń arasynda KVI-men aýyratyn 5 naýqas anyqtaldy, olardyń barlyǵy ınfeksıalyq stasıonarda oqshaýlandy