Aksıonerlik qoǵamnyń bıylǵy qarjylyq qorytyndylary týraly esep berildi.
Memleket basshysy «Samuryq-Qazyna» AQ basqarma tóraǵasy Almasadam Sátqalıevti qabyldady, dep habarlaıdy Almaty-akshamy.kz Aqordanyń resmı saıtyna silteme jasap.
Qasym-Jomart Toqaevqa «Samuryq-Qazyna» aksıonerlik qoǵamynyń bıylǵy atqarǵan qyzmetiniń negizgi óndiristik kórsetkishteri men qarjylyq qorytyndylary týraly esep berildi.
Almasadam Sátqalıevtiń aıtýynsha, qordyń bıylǵy tabysy 10,5 trıllıon teńge bolady dep boljanyp otyr. Bul josparly kórsetkishten 22 paıyz joǵary. Buǵan munaı baǵasynyń kóterilýi, júk tasymaly men tranzıt kóleminiń ulǵaıýy, sondaı-aq elektr qýatyn óndirý jáne taratý kórsetkishteriniń artýy negizgi faktor boldy.
Sonymen qatar Memleket basshysyna áleýmettik jáne ınfraqurylymdyq nysandardy qarjylandyrýǵa qatysty tapsyrmalarynyń oryndalýy jóninde málimet berildi. Atap aıtqanda, gazben jáne sýmen qamtý, kólik jáne energetıka salalaryndaǵy 11 basym jobanyń iske asyrylý barysy týraly baıandaldy. Qordy basqarý keńesi jobalardy maquldap, Memleket basshysynyń Joldaýyn júzege asyrý jónindegi Jalpyulttyq is-sharalar josparyna engizdi.