Almaty ákimi Baqytjan Saǵyntaev jumys sapary kezinde "jedel járdem" qyzmetiniń jumysymen tanysyp, ujymymen kezdesti, dep habarlaıdy Almaty-akshamy.kz
Qala ákimi "jedel járdem" brıgadalaryna shaqyrýlardy qabyldaý jáne berý júzege asyrylatyn aqparattyq-dıspecherlik bólimniń jumysymen tanysty. Qyzmet ujymymen kezdesýde Baqytjan Saǵyntaev damý perspektıvalaryn, qyzmetkerler men jalpy uıymnyń ózekti máselelerin sheshýdi talqylady, sondaı-aq qańtar aıyndaǵy oqıǵalar kezinde zardap shekkenderge kómek kórsetkenderi úshin alǵysyn bildirdi.
"Jedel járdem" qyzmetkerleri ózderiniń kásibı mindetterin oryndaýda batyldyq tanytty. Terorıstik aktiler barysynda 5 qyzmetker zardap shekti, olardyń tórteýiniń densaýlyqtaryna jeńil dárejede zıan kelse, bireýiniń densaýlyǵy ortasha aýyrlyqta japa shekti. Sol kúnderi barlyǵy 2160 "jedel járdem" qyzmetkerleri jumys istedi.
Tártipsizdik barysynda zardap shekkenderge barǵan kezde 32 arnaıy avtokólik zaqymdandy. Búginde mesenattar jedel járdem qyzmetine 16 jedel járdem kóligin tapsyrdy.
Baqytjan Saǵyntaev qaıǵyly oqıǵa kúnderi jumys istegen barlyq qyzmetkerler materıaldyq kómek alatynyna sendirdi. Sondaı-aq, qala "jedel járdem" qyzmetin qajetti tehnıkamen jáne jabdyqtarmen qamtamasyz etedi.
Almaty ákimi qoǵamdyq densaýlyq basqarmasyna jaǵdaıdy zerdelep, jańa qosalqy stansıalardy ashý boıynsha usynystar engizýdi tapsyrdy. Budan basqa B. Saǵyntaev materıaldyq-tehnıkalyq qamtamasyz etý, "jedel járdem" qyzmetkerlerin qoldaý máselelerin sheshýdi turaqty baqylaýda ustaýdy tapsyrdy.
Qazirgi ýaqytta "jedel járdem" qyzmetinde qalanyń barlyq aýdandarynda 11 qosalqy stansıa bar, bul shaqyrý ornyna brıgadalardyń tez kelýin qamtamasyz etýge múmkindik beredi. Sondaı-aq uıymǵa avtojóndeý sheberhanalary, aqparattyq-jedel dıspecherlik qyzmet kiredi.
Shuǵyl medısınalyq kómekti turaqty negizde 200 brıgada kórsetedi: reanımasıalyq, qarqyndy terapıa brıgadalary, pedıatrıalyq, dárigerlik, feldsherlik jáne praktıkalyq jumys tájirıbesi bar, zamanaýı medısınalyq tehnologıalar men synaqtan ótken ádisterdi paıdalanatyn joǵary bilikti mamandardyń úlken shtaty. Olar aýrýhanaǵa deıingi kezeńde naýqastar men zardap shekkenderge ýaqtyly dıagnoz qoıý jáne kómek kórsetý úshin barlyq qajettiliktermen jabdyqtalǵan. Sonymen qatar, 25 brıgada rezervte tur.
Qala ákimdiginiń qoldaýymen sońǵy eki jylda qyzmettiń negizgi máseleleri sheshildi. Yntalandyrý komponentterin tóleýge jergilikti búdjetten 256 mıllıon teńge bólindi. Avtopark 70% jańartyldy, 140 "jedel járdem" avtokóligi satyp alyndy.