Sonymen qatar qala ákimi aýdannyń bilim berý ınfraqurylymynyń damýymen tanysty.
Almaly aýdanyna jumys sapary barysynda Almaty ákimi Baqytjan Saǵyntaev emhanalar men mektepterdi modernızasıalaý máselelerin qarady jáne qala aýmaqtaryn abattandyrýmen tanysty, dep habarlaıdy Almaty-akhamy.kz.
Megapolıs ákimi aýdandy aralaý kezinde 65 orynǵa eseptelgen qalalyq revmatologıalyq ortalyqta boldy. Medısınalyq mekemeniń bas dárigeri A. Kúlembaevanyń aıtýynsha, Almatyda revmatoıdty dertke shaldyqqan 11 myńǵa jýyq adam bar eken. Sondyqtan olarǵa ýaqtyly medısınalyq kómek kórsetý úshin emdeý mekemesin keńeıtý qajet. Jaǵdaıdy zerttegen Baqytjan Saǵyntaev tósek-oryn sanyn 200-250-ge deıin arttyrý úshin ortalyqtyń jańa korpýstaryn salý jobasyn ázirleýdi tapsyrdy.
Al, ardagerlerge arnalǵan aýysymyna 500-ge deıin kelýshini qabyldaıtyn qalalyq emhana ǵımaraty kúrdeli jóndeýdi qajet etedi. Emhanaǵa 30 myńnan astam adam bekitilgen. 1955 jyly salynǵan ǵımarat 10 jyl buryn jóndelgen. Almaty ákimi B. Saǵyntaevtyń tapsyrmasy boıynsha emhanany seısmıkalyq nyǵaıtý jáne kúrdeli jóndeýden ótkizý múmkindigi qarastyrylatyn bolady.
Qala ákimi aýdannyń bilim berý ınfraqurylymynyń damýymen tanysty. Oqýshylar oryndarynyń tapshylyǵyn azaıtý maqsatynda №34 mektep-gımnazıasynyń 600 oryndyq jańa korpýsy salynýda. Sonymen qatar, Qabanbaı batyr kóshesiniń boıynda jeke ınvestor buryn qurylysy toqtaǵan nysan negizinde 856 oryndyq daryndy balalarǵa arnalǵan mektep salyp jatyr. Balalardyń denesin shynyqtyrý úshin MJÁ aıasynda №128 mektep aýmaǵynda kóp fýnksıonaldy sport kesheni salynýda. Barlyǵy 11 sport kesheni salynady, al mektep janyndaǵy qoldanystaǵy 33 sport alańy modernızasıalanady.
Sondaı-aq, Baqytjan Saǵyntaev DEPO Evolution Park-tiń qurylys barysymen tanysty, munda kreatıvti ındýstrıa jobalaryn iske asyrýǵa arnalǵan alań jasalatyn bolady. Maqataev skverinde qala ákimine «Býkkrossıng» kóshpeli kitaphanasynyń jobasy tanystyryldy, munda árkim kitap ala alady, ózinikin qaldyrady nemese qalaǵan basylymyn oqýǵa alady. Aýdannyń saıabaqtary men skverlerinde osyndaı 10 kitaphana ornatý josparlanýda.
Jumys sapary barysynda qala ákimine jeke ınvestor esebinen Máýlenov kóshesin abattandyrý jobalary kórsetildi. Baqytjan Saǵyntaev Seıfýllın dańǵylyndaǵy 450, 452, 452/1, Jibek joly kóshesiniń buryshyndaǵy aýlalardy rekonstrýksıalaýdyń barysyn qarap shyqty. «Búdjetke qatysý» jobasy aıasynda aýdanda Áýezov pen Áıteke bı kósheleriniń qıylysyndaǵy A. Baıtursynov atyndaǵy jáne «ARO» skverleri abattandyrylýda. Varlamov kóshesinde joba aıasynda skeıt-park salyndy.