Mınıstr qant tapshylyǵy Reseı Federasıasynyń qant eksportyna salǵan tyıymyna baılanysty ekenin aıtty.
Saýda jáne ıntegrasıa mınıstri Baqyt Sultanov Qazaqstanda qant tapshylyǵy baryn moıyndady, dep habarlaıdy Almaty-akshamy.kz.
Onyń aıtýynsha, EEK Keńesiniń 2022 jyl 15 sáýirdegi sheshimi sheńberinde Qazaqstan Respýblıkasyna 2022 jylǵy 31 tamyzǵa deıin 350 myń tonna kóleminde aq qant pen shıki quraq qantty bajsyz ákelý quqyǵy berilgen.
Sondaı-aq, ol «QTJ» UK» AQ búginde Qazaqstan Respýblıkasynyń aýmaǵynda qant tıelgen 152 vagon (10 myń tonnadan asa) kele jatqanyn, 58 vagon túsirý ornyna jetkenin, 94 vagon mejeli stansıaǵa 7 táýlik ishinde keletinin aıtty.
«Bıyl 27 mamyrda Nur-Sultan qalasyna «Azyq-túlik kelisim shart korporasıasy» 2 vagon qant (shamamen 130 tonna) kelip tústi. Al 30 mamyrda Nur-Sultanǵa kelgen qantty Magnum saýda jelisi satyp aldy, ol bólshek saýda oryndaryna jetkizilip jatyr», - dedi mınıstr.