Ońtústik Koreıanyń burynǵy prezıdenti Iýn Sok Óldiń jubaıy túrmege sottaldy. Oǵan qymbat syılyqtar alǵany úshin aıyp taǵylǵan, - dep habarlaıdy aqshamnews.kz Yonhap agenttigine silteme jasap.
Chanel sómkeleri, Graff alqasy jáne úkim
Seýl soty Kım Gon Hıdi 1 jyl 8 aıǵa bas bostandyǵynan aıyrýǵa úkim shyǵardy. Sot ony bızneske qatysty jeńildikter alýǵa umtylǵan Birigý shirkeýi (Unification Church) ókilderinen qymbat zattar alǵany úshin kináli dep tanydy.
Áńgime Chanel sómkesi men Graff áshekeı alqasy týraly bolyp otyr. Kım bul syılyqtardy 2022 jylǵy shildede alǵan. Sot bul syıdyń bıznes múddelerine qoldaý kórsetý týraly ótinishterimen baılanysty bolǵanyn anyqtady.
Sonymen qatar, buǵan deıin alynǵan taǵy bir Chanel sómkesin sot para retinde tanymady, sebebi sol kezeńde syılyq bergen taraptan naqty talaptar qoıylǵany dáleldenbegen.
Seýldiń ortalyq aýdandyq soty Kım Gon Hıdi Deutsch Motors kompanıasy aksıalarynyń baǵamyn qoldan ósirý isine qatysy bar degen aıyptan, sondaı-aq, saıası qorlar týraly zańdy buzdy degen kúdikten aqtady.
Tergeý dereginshe, ol 2010–2012 jyldary aksıalarmen baılanysty aıla-sharǵy sqemasyna qatysqan. Alaıda sot onyń tikeleı qatysýyn dáleldeıtin aıǵaqtar jetkiliksiz degen qorytyndyǵa keldi.
Sondaı-aq, sot Kım men onyń jubaıyna 2022 jylǵy prezıdent saılaýy qarsańynda tegin áleýmettik saýalnamalar berilgenin moıyndady, biraq muny ekonomıkalyq paıda retinde baǵalamady: sebebi ol saýalnamalar tek solarǵa arnap jasalmaǵan.
Tárkileý jáne apelásıa
Sot Kımnen 12,8 mıllıon vondy (shamamen 4,47 mıllıon teńge) tárkileýdi de sheshti. Osylaısha Kım Gon Hı men burynǵy prezıdent Iýn Sok Ól el tarıhynda qylmystyq ister boıynsha naqty túrme jazasyn alǵan alǵashqy prezıdenttik jup atandy.
Arnaıy prokýror komandasy úkimdi tym jumsaq dep atap, shaǵymdanatynyn málimdedi. Al Kımniń advokattary da apelásıa berý múmkindigin qarastyryp jatqanyn aıtty.
Iýn Sok Ól isi
Eske salaıyq, burynǵy prezıdent Iýn Sok Ól 2025 jylǵy 4 sáýirde elde áskerı jaǵdaı engizý áreketi sátsiz aıaqtalǵannan keıin qyzmetinen shettetilgen edi. Sol kezde alǵash ret el tarıhynda qyzmettegi prezıdentke qatysty qamaýǵa alý orderi shyǵarylǵan.
Iýn Sok Ól buǵan deıin 2024 jyly áskerı jaǵdaı engizýge baılanysty is boıynsha 5 jylǵa sottalǵan. Qazir ol basqa da qylmystyq ister boıynsha tergelip jatyr, onyń ishinde búlikti basqardy degen aıyp ta bar.