Búgín Alatau aqparat medıaholdıngíne Almaty máslıhatynyń mádenıet, sport, íshkí sayasat, dín jáne jastar máselelerí jóníndegí komıssıya ókílderí arnaıy kelíp, basylymdar men saıttardyń jūmys barysymen tanysty, - dep habarlaıdy aqshamnews.kz tílshísí.
Deputattar redaktsıyalyq protsesterdí kóríp, áleumettík jelíní júrgízíp otyrǵan jastarmen píkírlesíp, keńesterín ortaǵa saldy.
Komıssıya tóraǵasy Beıbít Qūsaıynov, tóraǵa orynbasary Serík Esmatov, sondaı-aq, Erkínbek Raqyshev pen Dulat Ramazanov medıaholdıng qūramyndaǵy «Almaty aqshamy», «Vechernıı Almaty» gazetteríníń redaktsıyalarymen, sondaı-aq Aqshamnews.kz, Vecher.kz, Alnews.kz aqparattyq saıttarynyń kúndelíktí jańalyq óndíru júıesímen tanysty. Alatau aqparat medıaholdıngí basshysy Erjan Qalymbaıūly resurstardy zamanǵa saı beıímdeuge qatysty júrgízílíp jatqan transformatsıyalarmen tanystyrdy.
Kezdesu barysynda komıssıya múshelerí ūjymmen tíldesíp, medıanyń qoǵammen baılanys ornatudaǵy rólí, qalalyq kún tártíbín aqparattyq súıemeldeu jáne jastar audıtorıyasymen jūmys júrgízudíń tıímdí joldary tóńíregínde oı bólístí. Bıyl shyqqanyna 90 jyl bolǵan «Vechernıı Almaty» jáne «Almaty Aqshamy» gazetí men áleumettík jelí, saıt redaktsıyasynda bolyp sóılestí. Dıdjıtal platformalarǵa kontent ázírleıtín jas mamandardyń jūmysyna da nazar audaryp, kontenttíń sapasyn arttyru, audıtorıyamen kerí baılanysty kúsheıtu sekíldí mańyzdy baǵyttar boıynsha píkír almasty.
Sapar ayasynda qonaqtar medıaholdıngtíń mūrajaıyn aralap, basylymdar tarıhy men redaktsıyanyń dástúrlí mektebíne qatysty qūndy derektermen tanysty. Sonymen qatar, jaqynda íske qosylǵan podkast studıyany tamashalap, qazírgí medıatrendterge saı multımedıalyq jobalardyń mańyzyna toqtaldy.
Deputattar tarıhı baı medıa ortalyqtyń jūmystaryn tūraqty qoldap kele jatqandaryn aıtyp, medıaholdıng ūjymyna shyǵarmashylyq tabys tílep, qala tūrǵyndaryn sapaly árí jedel aqparatpen qamtu baǵytyndaǵy jūmystyń ózektí ekenín atap óttí.