Konstıtýsıalyq komısıanyń kezekti otyrysy bastaldy, - dep habarlaıdy aqshamnews.kz tilshisi.
Konstıtýsıalyq sot tóraǵasynyń orynbasary Baqyt Nurmuhanov Konstıtýsıalyq reforma komısıasynyń múshelerine Ata Zańǵa engiziletin ózgeristerdiń jıyntyq jobasyn tanystyrdy.
Bul qujat azamattardan, saıası partıalardan, qoǵamdyq uıymdardan jáne sarapshylardan túsken barlyq usynystardyń negizinde ázirlendi. Baqyt Nurmuhanovtyń aıtýynsha, jańartylǵan Konstıtýsıa jobasynda Preambýla, 11 bólim jáne 104 bap bar. "Halyq keńesi" jáne "Konstıtýsıaǵa ózgerister men tolyqtyrýlar engizý" atty eki jańa bólim engizilgen. Taǵy 4 bólimniń ataýy ózgerdi.
Jalpy, ózgerister men tolyqtyrýlar Ata zańnyń barlyq bólimderin qamtyp, 77 bapqa túzetýler engizildi. Bul Konstıtýsıa mátininiń 84%-y.
"Usynylǵan ózgerister – mańyzdy ári aqylǵa muqıat salynǵan qadam, olar tujyrymdamalyq tásilderdi ózgertip, quqyqtyq dáldikti nyǵaıtyp, Konstıtýsıanyń sapasyn arttyrady", – dep atap ótti Konstıtýsıalyq komısıanyń múshesi.
Jıyntyq joba bilikti zańgerler men lıngvıserden quralǵan jumys toptarynda qatar pysyqtalýda.
Baqyt Nurmuhanovtyń aıtýynsha, mamandar Konstıtýsıanyń normalaryn durys jazý, maǵynalyq sáıkessizdikter men qarama-qaıshylyqtardy, sondaı-aq túsiniksizdikterdi boldyrmaý boıynsha úlken jumys atqardy.
Jıyntyq jobada usynylǵan novelalar Qazaqstannyń konstıtýsıalyq negizderin qamtyp, onyń kelbetin túbegeıli ózgertedi. Bul túzetýler kózdelgen ınstıtýsıonaldyq jáne qurylymdyq reformalar úshin úlken áleýetke ıe.
"Adam men azamattyń konstıtýsıalyq quqyqtary men bostandyqtaryn júzege asyrý jáne qorǵaý kepildikteri kúsheıtilip jatyr. Prezıdenttik basqarý formasyn saqtaı otyryp, memlekettik bılik qurylymy aıtarlyqtaı ózgeredi", – dep málimdedi Konstıtýsıalyq sot tóraǵasynyń orynbasary.
Sonymen qatar, ol negizgi ózgeristerdi de atap ótti: jańa bir palataly Parlament modeli engiziledi, azamattardyń memlekettik basqarýǵa qatysý múmkindikteri keńeıedi, Konstıtýsıalyq sottyń quqyq qorǵaý tetikteri men Ata zań negizinde quqyq ústemdigin qamtamasyz etý boıynsha qyzmetiniń tıimdiligi artady.
Baqyt Nurmuhanovtyń habarlaýynsha, konstıtýsıalyq novelalar memleket mısıasyn, onyń fýnksıalarynyń mazmunyn, memlekettik organdar, qoǵamdyq uıymdar men azamattar arasyndaǵy ózara qarym-qatynas qaǵıdattaryn jańa qyrynan túsinýge múmkindik beredi, azamattyq qoǵam ınstıtýttaryn memlekettik mańyzy bar máselelerdi sheshýge keńinen tartýǵa jol ashady.
"Bul Konstıtýsıa mazmunynyń jańarýy men túbegeıli ózgerýi týraly aıtýǵa múmkindik beredi", – dep atap ótti ol.