Qorǵanys mınıstri 23 qańtarda Óskemen garnızonyna qarasty áskerı bólimderdiń birinde bolǵan qaıǵyly jaǵdaıǵa qatysty birneshe adamdy qyzmetinen bosatty, - dep habarlaıdy aqshamnews.kz tilshisi.
"Barlyq oqıǵa boıynsha naqty kadrlyq jáne tártiptik sheshimder qabyldandy. "Shyǵys" óńirlik qolbasshylyǵynyń qolbasshysy, shtab bastyǵy jáne qolbasshynyń tárbıe jáne ıdeologıalyq jumys jónindegi orynbasary tártiptik jaýapkershilikke tartyldy. Áskerı qyzmetshi qaza tapqan áskerı bólimniń komandıri, onyń orynbasary, sondaı-aq batalón komandıri atqaryp otyrǵan laýazymdarynan bosady", - dep habarlanǵan Qorǵanys mınıstrliginiń resmı málimdemesinde.
Aıta keteıik, Qorǵanys mınıstrligi bul málimdemesinde sondaı-aq osyndaı oqys jaǵdaılardyń aldyn alýǵa baǵyttalǵan alty sharasy týraly aıtqan edi.