Depýtat Jarqynbek Amantaıuly premer-mınıstrdiń orynbasary – mádenıet jáne aqparat mınıstri Aıda Balaevaǵa jáne bas prokýror Berik Asylovqa depýtattyq saýal joldap, el ishinde keńinen jarnamalanatyn keıbir trenıńtik kýrstar azamattarǵa rýhanı, psıhologıalyq jáne qarjylyq zıan keltirip otyrǵanyn málimdedi, - dep habarlaıdy aqshamnews.kz tilshisi.
Depýtat mundaı baǵdarlamalardyń ádistemesin resmı tekserip, quqyqtyq baǵa berýdi jáne lısenzıalaý/sertıfıkattaý arqyly memlekettik retteý tetigin engizýdi usyndy.
Depýtat Jarqynbek Amantaıuly Qyzylordada ótken Ulttyq quryltaıda Memleket basshysy "qoǵam sanasyn ýlaıtyn jat qundylyqqa" qarsy baǵdarlamalar ázirleýdi tapsyrǵanyn eske sala otyryp, osy baǵyttaǵy qaýiptiń bir kórinisi retinde túrli "trenıńtik kýrstardy" atady.
"Búginde jarnamasy jańǵyryp turǵan trenıńter azamattarymyzǵa paıda emes, kerisinshe rýhanı, psıhologıalyq jáne qarjylyq zıan keltirip otyr. Mysal keltireıin. vybor.kz ınternet platformasy arqyly óz qyzmetin belsendi túrde nasıhattaıtyn MINDFULNESS oqý ortalyǵy úsh satyly trenıń usynady. Birinshi jalpy kýrs - 50 000 myń teńge. Ekinshi transformasıalyq kýrs - 95 000 myń teńge. Úshinshi kóshbasshylyqty damytý kýrsy - 150 000 myń teńge. Onlaın formattaǵy "emosıonaldyq erkindik" kýrsynyń quny 200 000 myń teńgege jetedi. Osyndaı "kreatıvti oılaýdy", "tıimdi komýnıkasıany", "sheshen sóıleýdi" tegin úıretemiz dep ýáde beretin ortalyqtar da az emes. Olardyń qatarynda sheteldik "Vektor", "Lıder-motıvator" sekildi ataýmen jumys isteıtin ortalyqtar bar", - dedi ol.
Amantaıuly keıbir kýrstarda qatysýshylardyń telefondaryn jınap alyp, moraldyq qysym arqyly jeke problemasyn kópshilik aldynda aıtýǵa májbúrleıtin tájirıbeler baryn, tipti qorlaý sıpatyndaǵy tapsyrmalar kezdesýi múmkin ekenin keltiredi. Ol munyń sońy adamnyń sanasyn "tájirıbe alańyna" aınaldyrýǵa ulasyp, kýrs aıaqtalǵannan keıin qatysýshydan mindetti túrde basqa adamdardy tartýdy talap etý, qorqytý, manıpýlásıa sıaqty áreketterge jalǵasýy yqtımal ekenin aıtady.
Osyǵan baılanysty depýtat ýákiletti organdardan:
- bul kýrstardyń baǵdarlamalyq mazmuny men ádistemesin, zańnamaǵa sáıkestigin resmı tekserýdi;
- azamattardy qorlaý, psıhologıalyq qysym kórsetý, májbúrleý jáne manıpýlásıa belgileri bar áreketterge quqyqtyq baǵa berýdi;
- mundaı trenıńterge lısenzıalaý, sertıfıkattaý jáne memlekettik retteý tetigin engizý múmkindigin qarastyrýdy suraıdy.