Konstıtýsıalyq komısıanyń kezekti otyrysy bastaldy, - dep habarlaıdy aqshamnews.kz tilshisi.
Konstıtýsıanyń Preambýlasyn tolyq jańartyp, memleket pen dinniń ózara yqpaldastyǵy normalaryn jetildirý usynylady. Bul týraly Konstıtýsıalyq sot tóraǵasynyń orynbasary Baqyt Nurmuhanov Konstıtýsıalyq komısıaǵa túzetýlerdyń jıyntyq jobasyn tanystyrǵan kezde málimdedi.
Onyń aıtýynsha, Konstıtýsıanyń Preambýlasyn jańa redaksıada tolyq ózgertý usynylyp otyr, ol jańa ulttyq qundylyqtardy jáne qazirgi zamannyń talaptaryn eskere otyryp daıyndalǵan.
Baqyt Nurmuhanovtyń aıtýynsha, Preambýlada Konstıtýsıany qabyldaýdyń negizgi maqsattary, qaǵıdattary, qundylyqtary jáne sebepteri bekitilgen. Sondaı-aq, qoǵamdyq baǵdardy anyqtaıtyn memlekettiń mısıasy, tarıhı kontekst pen mádenı erekshelikter kórinis tabady. Jalpy alǵanda, Preambýla qoǵam men memlekettiń damý baǵytyn aıqyndaıdy.
"Jobada memlekettiń mártebesi anyqtalǵan – Qazaqstan Respýblıkasy demokratıalyq, zaıyrly, quqyqtyq jáne áleýmettik memleket, al onyń eń joǵary qundylyqtary – adam, onyń ómiri, quqyqtary men bostandyqtary retinde tanylǵan", – dep atap ótti Baqyt Nurmuhanov
Jalpy, ol "Konstıtýsıalyq qurylym negizderi" bóliminde memlekettiń uıymdastyrylýyn, Qazaqstannyń egemendigin, aýmaqtyq tutastyǵyn jáne basqa da mańyzdy qaǵıdattardy bekitetin negizgi erejeler kórsetiletinin atap ótti.
Sonymen qatar, bılikti bólý qaǵıdaty týraly norma jańasha tujyrymdaldy jáne eldiń qoldanystaǵy quqyǵy máselelerine arnalǵan konstıtýsıalyq erejeler naqtylandy.
Baqyt Nurmuhanov qazirgi zamandaǵy máselelerdi eskere otyryp, qoǵamdyq birlestikterdiń qyzmetin jáne olardyń memleketpen ózara is-qımylyn retteıtin konstıtýsıalyq erejelerdiń de naqtylanǵanyn atap ótti.
"Memleket pen dinniń, memlekettik rámizderdiń jáne basqalardyń ózara is-qımylyn retteıtin erejeler jetildirilip jatyr", – dep atap ótti ol.