Almatydaǵy Oqýshylar saraıynda qala ákiminiń orynbasary Ásem Núsipova bilim men ǵylymda, óner men sportta úzdik jetistikterge jetken oqýshylarmen kezdesti. Bul is-shara Memleket basshysynyń tapsyrmasymen jarıalanǵan «Qazaqstan balalary» onkúndigi aıasynda ótip jatqan «Bala úni» atty taqyryptyq kúnine oraılastyryldy.
Kezdesýge álem elderinde el namysyn qorǵap júrgen daryndy balalar jınaldy. Olardyń qatarynda Jáýtikov atyndaǵy olımpıada, Azıa-Tynyq muhıty matematıkalyq olımpıadasy, «Jibek joly» ıntellektýaldy jarystarynyń júldegerleri, tipti Húston, Beıjiń, Máskeý, Tashkent sekildi iri qalalarda ótken jarystarda top jaryp, birneshe ret jeńis tuǵyrynan kóringender de bar. Sondaı-aq, jıynǵa sózge sheshen jas oratarlar, qalamy júırik jas jazýshylar, ónertapqysh robototehnıkter, áýezdi ánshi-vokalıster men shymyr sportshylar da qatysty.
«Sizder – Almatynyń zıatkerlik áleýetisizder. Biz árqaısyńyzben maqtanamyz. Sizderdiń búgingi jetistikterińiz – erteńgi eldiń tiregi bolmaq. Bul tek sizderdiń ǵana emes, ata-analaryńyz ben ustazdaryńyzdyń da eńbegi. Biz sizderge jaıly jaǵdaı jasaýdy ári qaraı jalǵastyra beremiz. Sizderdiń usynystardy mindetti túrde elep-eskeretin bolamyz. Kele jatqan merekelerińiz qutty bolsyn! Jazǵy demalystaryńyz jaqsy ótsin!», – dedi qala ákiminiń orynbasary Ásem Núsipova.
Kezdesý óte jyly, erkin formatta ótti. Oqýshylar óz jobalaryn tanystyryp, bilim berý, ǵylym men qalanyń damýy týraly usynystaryn ortaǵa saldy.
Aıta keteıik, Almatyda balalarǵa arnalǵan qosymsha bilim berý keń damyp keledi. Qazirdiń ózinde bul baǵytta 141 uıym jumys isteıdi: 7 oqýshylar úıi, 8 mýzyka mektebi, óner mektebi men 122 jeke stýdıa bar. Jaqynda kúrdeli jóndeýden ótken Oqýshylar saraıy balalarǵa esik ashty. Munda zerthanalar, kovorkıngter, elimizdegi eń iri observatorıa ornalasqan. Sondaı-aq Alataý men Naýryzbaı aýdandarynda eki zamanaýı ortalyq ashylyp, «Samǵaý» ortalyǵy men «Jas qanat», «Aınabulaq», «Saıaly» shaǵynaýdandarynda jańa shyǵarmashylyq úıirmeler iske qosylady. Bul – balalardyń jan-jaqty damýyna jasalǵan naqty qadam.
