«Azyq-túlik kelisimshart korporasıasy» UK» AQ ulttyq astyq operatory jáne Qazaqstandaǵy Birikken Ulttar Uıymynyń Damý baǵdarlamasy (BUUDB) Turaqty agroóndiris, eginshiliktiń ekologıalyq tájirıbesin engizý jáne Soltústik Qazaqstannyń ekojúıelerin saqtaý (FOLUR) salasyndaǵy yntymaqtastyq týraly kelisimge qol qoıdy.
Bul bastama Jahandyq ekologıalyq qordyń qoldaýymen QR Aýyl sharýashylyǵy mınıstrligimen jáne Qazaqstandaǵy BUUDB-men seriktestikte iske asyrylýda, - dep habarlaıdy Aqshamnews.kz.
Kelisim aıasynda BUUDB jalpy somasy 2 mln AQSH dollaryna jýyq granttyq qarjylandyrý bóledi. Qarajat jergilikti jáne sheteldik mamandardy tarta otyryp, pılottyq jobalaryndy ǵylymı súıemeldeýge, sondaı-aq baǵdarlamany iske asyrýǵa operator men sharýalardyń shyǵystaryn óteýge jumsalady.
BUUDB-men seriktestik burshaq jáne kópjyldyq shópterdi, sonyń ishinde jasymyq pen jońyshqany ósirý úshin aýyl sharýashylyǵy óndirýshilerin úsh jyl merzimge forvardtyq qarjylandyrýdy kózdeıdi. Óz kezeginde, fermerler zamanaýı agrotehnologıalardy qoldanady, aýyspaly egisterdi saqtaıdy jáne egis alqaptaryn ártaraptandyrady.
«Memlekettik ınstıtýttar men halyqaralyq áriptesterdiń kúsh-jigerin biriktire otyryp, biz Qazaqstannyń azyq-túlik qaýipsizdigin nyǵaıtýǵa jáne fermerlerdi ekologıalyq jáne qarjylyq turaqty eginshilik tájirıbesine kóshýde qoldaýǵa tyrysamyz», - dep atap ótti BUUDB-nyń Qazaqstandaǵy turaqty ókili Katarjına Vavernıa.
Jobany iske asyrý Soltústik Qazaqstanda ósirýge qolaıly daqyldardy jáne agroónimderdi odan ári ótkizý úshin ońtaıly eksporttyq naryqtardy aıqyndaý úshin ǵylymı jáne marketıńtik zertteýler júrgizýdi kózdeıdi. Jobaǵa qatysatyn árbir sharýashylyq halyqaralyq jáne qazaqstandyq ǵalymdardyń usynymdarymen súıemeldenedi.
«Qazaqstan Ortalyq Azıadaǵy osy baǵdarlamaǵa qosylǵan alǵashqy el. Áleýetti seriktesterdi qaraý barysynda BUUDB aýyl sharýashylyǵy óndirýshilerin qarjylandyrý men súıemeldeýdiń praktıkalyq tájirıbesin eskerdi. Azyq-túlik kelisimshart korporasıasy agroóndiristi júrgizýde qajetti quzyretterge ıe bolǵandyqtan, sheshim ulttyq operatordyń paıdasyna qabyldandy», - dedi «Azyq-túlik kelisimshart korporasıasy» Basqarma tóraǵasy Asylhan Djývashev.
Onyń aıtýynsha, BUUDB-men birlesken jumys egis alqaptaryn ártaraptandyrýǵa jáne Qazaqstanda agrobıznesti yntalandyrýdyń jańa tetikterin engizýge yqpal etedi.