Ol densaýlyq saqtaý, bilim berý jáne jaıly orta qurýǵa qatysty ózekti máselelerdi kóterdi.
Búgin Almaty qalasy Áýezov aýdanynyń ákimi Saıran Saıfedenov Óńirlik komýnıkasıalar qyzmetiniń brıfıńine qatysty, dep habarlaıdy Almaty-akshamy.kz
Saıran Saıfedenovtyń aıtýynsha, búgingi kúni osy saladaǵy ózekti másele 18-shi emhananyń shamadan tys júktelýi bolyp qalýda.
«Qala ákimi E. Dosaev aýdan turǵyndarymen ótken sońǵy kezdesýde atap ótkendeı, "Mamyr", "Taýgúl", "Qýanysh", "Shabyt" jáne "Atameken" shaǵynaýdandarynyń 30 myńǵa jýyq azamatyna medısınalyq qyzmet kórsetýge arnalmaǵan 3 fılıaldyń úı-jaılarynda qyzmet kórsetý jalǵasýda», - habarlady aýdan ákimi.
Qala ákiminiń tapsyrmasyna sáıkes, qazir "Mamyr-1" shaǵynaýdanynda bir aýysymda 200 adam qabyldaıtyn otbasylyq dárigerlik ambýlatorıa qurylysy jalǵasýda. Jumystardy kelesi jyldyń I toqsanynda aıaqtaý josparlanyp otyr.
Sonymen qatar, aǵymdaǵy jyldyń sońyna deıin jer telimin "Qýanysh" shaǵynaýdanynan satyp alýdy josparlap otyrmyz. Aýysymyna 300 kelýshige arnalǵan №18 emhananyń negizgi ǵımaratyn salý kózdelýde. Jobalyq-smetalyq qujattamany ázirleımiz jáne qurylysty kelesi jyly bastaımyz dep otyrmyz.
S. Saıfedenov orta jáne mektepke deıingi bilim berý salasyndaǵy jaǵdaı týraly tolyq aıtyp berdi. Áýezov aýdany ákiminiń aıtýynsha, 48 mektep jumys isteıdi, onyń 33-i memlekettik mektep. Barlyǵy 53 269 oqýshy bar. Oqýshy oryndary tapshylyǵynyń joǵary deńgeıi negizgi problemalyq másele bolyp qalyp otyr.
«Oqýshy oryndary tapshylyǵynyń joǵary deńgeıi negizgi problemalyq másele bolyp qalyp otyr. Aǵymdaǵy jyldyń basynda 3 mektepke - №6, 121, 133 mektepterine qosalqy ǵımarat qurylysyn paıdalanýǵa berý 1 725 oqýshy ornynyń tapshylyǵyn tómendetýge múmkindik berdi. Alaıda, kóp qabatty turǵyn úı keshenderiniń qurylysy aıasynda tapshylyqtyń kútiletin deńgeıi búginde 3 600 orynǵa deıin ósti.
Osy jyldyń mamyr aıynda 4 shaǵynaýdanda 400 oryndyq «Dostyq» jeke mektebi ashyldy. Aǵymdaǵy jyldyń 1 qyrkúıegine qaraı mektepterge qosymsha 1 725 orynǵa 2 qosymsha qurylys paıdalanýǵa beriledi (№117 mektepte 900 oryndyq jáne №132 mektepte 825 oryndyq).
Kelesi jyly 5 bilim berý nysanynyń qurylysyn jobalaý jáne bastaý boıynsha jumystar, onyń ishinde №104 mektepke 400 oryndyq qosymsha qurylys salý, salynyp jatqan «City plus» jáne «Belkamıt» turǵyn úı keshenderi janynda 1 500 oryndyq 2 jańa mektep jáne 800 oryndyq 2 balabaqsha salý josparlanǵan.
Sonymen qatar, aǵymdaǵy jyldyń mamyr aıynda 3 mektepte - №122, 141, BIL-de seısmıkalyq kúsheıtýge baılanysty kúrdeli jóndeý bastaldy. Aıaqtalý merzimi – 2023 jyldyń III toqsany.
Jóndeý jumystary kezinde 122 mekteptiń oqýshylary №86 jáne №111 mektepterde, 141 mekteptiń oqýshylary №126 jáne №132 mektepterde, al Bilim-ınnovasıa lıseıiniń oqýshylary №153 jáne №202 mektepterde ornalasatyn bolady.
Saıran Saıfedenov ótken jyldyń qorytyndysy boıynsha 752 oryndyq 10 jekemenshik balabaqsha ashylyp, 187 jumys orny ashylǵanyn habarlady. Alaıda, qazirgi ýaqytta aýdan boıynsha tapshylyq 8 047 oryndy quraıdy.
Mektepke deıingi mekemelerde oryn tapshylyǵyn azaıtý maqsatynda 280 oryndyq 2 memlekettik balabaqsha salý josparlanýda.
«Birinshi balabaqsha boıynsha 120 orynǵa "Altyn besik" shaǵynaýdanynda aǵymdaǵy jyldyń qazan aıynyń sońyna deıin JSQ ázirleý jáne ony memlekettik saraptamadan ótkizý aıaqtalady. QMJ 2023 jyldyń I toqsanynda qurylysty bastaýdy josparlap otyrmyz», - dep habarlady aýdan ákimi.
Ekinshi balabaqsha boıynsha mamyrda 10-shy shaǵynaýdanda 160 orynǵa qaraýsyz qalǵan balabaqsha ǵımaraty satyp alyndy. Aǵymdaǵy jyldyń qyrkúıek aıynda búdjetti naqtylaý kezinde jobalyq-smetalyq qujatamany ázirleýge qarajat bólý josparlanýda. Kelesi jyly memlekettik saraptamadan ótkennen keıin qoldanystaǵy ǵımaratty buzyp, qurylysty bastaý josparlap otyr.