Áýezov aýdanyndaǵy 18 ǵımaratqa arhıtektýralyq jaryqtandyrý ornatylyp, 37 turǵyn úıdiń qasbeti qarasha aıynyń sońyna deıin jóndeledi
«2023–2029 jyldarǵa arnalǵan turǵyn úı-kommýnaldyq ınfraqurylymdy damytý tujyrymdamasy» aıasynda Almaty qalasynyń Áýezov aýdanynda turǵyn úı qory jańartylyp jatyr. Óńirlik komýnıkasıalar qyzmetiniń alańynda Áýezov aýdanynyń ákimi Abzal Egemberdıev osylaı dedi.
Onyń aıtýynsha, Áýezov aýdanynda 1917 kóppáterli turǵyn úı bar, olardyń 797-si 1960–1970 jyldary salynǵan. Bıyl qaıtarymdy negizde 76 úıge jóndeý jumystary júrgizile bastady. Onyń ishinde 28 úıge jańa lıftter (34 birlik) ornatylyp, 48 úıde shatyr men ınjenerlik jelilerdi aýystyrý boıynsha kúrdeli jóndeý jasalady. Jalpy ınvestısıa kólemi – 1,1 mlrd teńge.
Sonymen qatar bıyl qarasha aıyna deıin 37 úıdiń qasbeti jóndelip, syrlanady. 18 ǵımarat osy zamanǵy arhıtektýralyq jaryqtandyrýmen bezendirilip, aýdannyń estetıkalyq kelbetin arttyra túspek.