Atyraýda stýdent qyz qatarlasyn aıaýsyz soqqyǵa jyǵyp, qylmystyq is qozǵaldy, - dep habarlaıdy Aqshamnews.kz.
Oqıǵa qaladaǵy saıabaqtardyń birinde bolǵan. Vıdeosy áleýmettik jelide tarady.
Jelide taraǵan beınejazbada aq tústi kofta kıgen qyzdyń jerge qulaǵan qatarlasyna judyryqpen birneshe ret soqqy jasap, keıin basynan teýip jatqan sáti anyq kórinedi.
Polısıa túsinikteme berdi
Atyraý oblystyq polısıa departamenti kúdikti qyzdyń ustalǵanyn habarlady. Ol qazir Kámeletke tolmaǵandardy beıimdeý ortalyǵyna jetkizilgen.
"Barlyq qatysýshy profılaktıkalyq esepke alynady. Materıaldar kámeletke tolmaǵandar isi jónindegi komısıaǵa joldandy. Sondaı-aq, balalardy tárbıeleýde mindetterin durys oryndamaǵany úshin kámeletke tolmaǵandardyń ata-analary ákimshilik jaýapkershilikke tartylyp jatyr", - dep málimdedi polısıa.
Vedomstvo oqıǵany vıdeoǵa túsirip, áleýmettik jelige júktep, biraq polısıaǵa habarlamaǵan jasóspirimge de quqyqtyq baǵa beriletinin atap ótti.
Jábirlenýshige kómek kórsetildi
Balalardyń quqyqtaryn qorǵaý komıteti zardap shekken qyzdyń aýrýhanaǵa jetkizilgenin habarlady. Dárigerler oǵan qajetti medısınalyq kómek kórsetip, keıin úıine jibergen. Qyzǵa qosymsha psıhologıalyq qoldaý uıymdastyrylady.
Komıtettiń málimetinshe, kolej tarapynan da jumys júrgizilip jatyr: ata-analarmen jáne stýdenttermen áńgimeler ótkizilgen, oblystyq bilim basqarmasy jaǵdaıdy tekserip, arnaıy buıryq shyǵarǵan. Aımaqtyq balalar ombýdsmeni de oqıǵa ornyna baryp, jaǵdaıdy baqylaýda ustap otyr.