Osydan týra 30 jyl buryn, 28 qyrkúıekte tájik-aýǵan shekarasynda qazaqstandyq shekarashy Radjan Batyrqanov erlikpen qaza tapty. Shekarany buzǵan sodyrlarmen bolǵan kúshi teń emes urysta komandıri men qarýlastarynyń ómirin saqtap qalý úshin sodyrlardyń oǵyn ózine burǵan Radjannyń erligi máńgi umytylmaıdy.
Búginde kishi serjant R.Batyrqanovtyń esimin enshilegen shekara bólimshesi jas shekarashy sarbazdardy batyrlyq pen patrıottyqqa úndeıtin tárbıe ortalyǵyna aınalǵan. Ózi týǵan Qatonqaraǵaıda kóshe men mekteptegi múıis batyrdyń esimimen atalady.
Erlik joly
1994 jylǵy 28 qyrkúıekte Hakım bandasynyń eki júzden astam qarýly sodyry 9 avtokólikpen Tájikstannyń Horog qalasy mańyndaǵy memlekettik shekarasyn kesip ótip, Aýǵanstanǵa ótýge bet alady. Olardyń jolyna 38 qazaqstandyq jáne reseılik shekarashy tosqaýyl bolyp turady.Soǵysqa birinshi bolyp kirgen reseılik ofıser Konstantın Selúk pen Radjan Batyrqanov qarýlastaryna modjahedterge tyldan shabýyldaýǵa múmkindik beredi. Alaıda urysta aýyr jaraqat alǵan Radjan kóp qan joǵaltyp, esin jımastan qaıtys boldy. Urystyń nátıjesinde modjahedter joıylyp, sodyrlardyń kepilindegi adamdar qutqaryldy.
Kórsetken erligi men batyldyǵy úshin kishi serjant R.Batyrqanov qaza tapqannan keıin Qazaqstan Respýblıkasy Prezıdentiniń Jarlyǵymen İİ dárejeli «Aıbyn» ordenimen marapattaldy. Bul erlik Otandy sheksiz súıýdiń jarqyn úlgisi bolyp tabylady. Táýelsizdigimizdiń 30 jyldyǵyna oraı batyr shekarashy Tájikstan Respýblıkasynyń joǵary nagradasy İ dárejeli «Spıtamen» ordeniniń ıegeri atandy.
2024 jyldyń 28 qyrkúıeginde elimizdiń túkpir-túkpirinde shekarashy R.Batyrqanovtyń esimin ulyqtap, erligine taǵzym etýge arnalǵan sharalar ótti. Solardyń biri UQK Shekara qyzmeti Almaty oblysy boıynsha departamenti uıymdastyrǵan is-shara boldy. Shekarashy ardagerler men jeke quram Máńgilik alaý basyna gúl shoqtaryn qoıyp, Uly Otan soǵysynyń batyrlaryna jáne Táýelsizdik jyldary erlikpen qaza tapqan shekarashylardyń rýhyna taǵzym jasady. Odan keıin №102 orta mektebiniń oqýshylary «Jas shekarashy» áskerı-patrıottyq klýbynyń qataryna kirý úshin ant qabyldady.
Budan bylaı №102 orta mekteptiń 7 «Á» synyby R.Batyrqanovtyń esimimen atalatyny týraly habardy departament bastyǵynyń orynbasary polkovnık A.Munalbaev máńgilik alaý basyna jınalǵan kópshilikke jetkizdi. Budan ári jas patrıottar Armıa úıine baryp, I.Panfılov murajaıyn aralap kórdi.
Iá, Otanǵa degen shynaıy súıispenshilik shekarashylarymyzdy beıbit kúnde de erlik isterge bastaıdy. UQK Shekara qyzmetiniń has batyryna aınalǵan Radjan Batyrqanovtyń erligi — sózimizdiń jarqyn úlgisi.