Balabaqshalar sanyn kóbeıtýge múmkindik bolsa da, sapa máselesi ózekti bolyp qala beredi - Mınıstr
Sońǵy 10 jylda jekemenshik balabaqshalar sany kúrt artyp, 3 jastan 6 jasqa deıingi balalar birden 99%-ǵa deıin qamtyldy. Bul týraly Bilim jáne ǵylym mınıstri Asqat Aımaǵambetov jelidegi paraqshasynda jazdy, dep habarlaıdy Almaty-akshamy.kz QazAqparat saıtyna silteme jasap.
«On jyldan astam ýaqyt buryn balabaqshalar sanynyń jyldam ósýin yntalandyrý úshin lısenzıalaýdan, keıin memlekettik baqylaýdan, monıtorıńten jáne olardyń qyzmetin retteýden bas tartý týraly sheshim qabyldandy. Ol qandaı nátıje berdi? Jekemenshik balabaqshalar sany kúrt artyp, 3 jastan 6 jasqa deıingi balalar birden 99%-ǵa deıin qamtyldy. Bul - jaqsy nátıje. Alaıda balabaqshalar sanyn kóbeıtýge múmkindik bolsa da, sapa máselesi ózekti bolyp qala beredi. Balabaqshalardyń jartysy tehnıkalyq jáne sanıtarlyq talaptarǵa saı kelmeıtin ǵımarattarda, bilikti mamandarsyz jáne qaýipti jaǵdaılarda ashylǵan. Mundaı faktiler jetkilikti. Eki jyl buryn biz lısenzıalaý men memlekettik baqylaýdy qaıtarýǵa áreket jasadyq. Alaıda sol kezde kásipkerler palatasynyń, balabaqshalar qaýymdastyǵynyń jáne birqatar memlekettik organnyń ustanymy bul normany zańǵa engizýge múmkindik bermedi. Biraq biz bul baǵytta jumysty toqtatpadyq. Byltyrǵy jyldyń sońynda memlekettik atestattaý júıesin engize aldyq. Attestasıa nátıjesi kóńilden shyqpady. Tekseristen ótken balabaqshalardyń 80%-y memlekettik attestasıadan óte almady. Áńgime balabaqshadaǵy búldirshinderge qolaıly jaǵdaı jasalmaýy, oqý-tárbıe jumystarynyń memlekettik bilim berý standartyna, qaýipsizdik tehnıkasy, órt jáne sanıtarlyq normalardyń talaptarǵa sáıkes kelmeýi, tárbıeshilerdiń qol kóterýi jáne basqa da keleńsiz faktiler týraly bolyp otyr», - dedi Bilim mınıstri.
Sonymen qatar mınıstr balabaqsha tárbıeshileriniń jalaqysyn kóbeıtý boıynsha pılottyq joba bastalǵany týraly aıtty.